ജിദ്ദ: രണ്ട് പുസ്തകങ്ങളിലൂടെയും നിരവധി രചനകളിലൂടെയും പ്രവാസി മലയാളി വിദ്യാര്‍ത്ഥികള്‍ക്കിടയില്‍ ശ്രദ്ധേയനായിത്തീര്‍ന്ന 'ലിറ്റില്‍ റൈറ്റര്‍' മുഹമ്മദ് അമാനെ അക്ഷരം വായനവേദി ജിദ്ദ ആദരിച്ചു. തനിമ സാംസ്‌കാരിക വേദി പ്രൊവിന്‍സ് പ്രസിഡന്റ് നജ്മുദ്ദീന്‍, മുഹമ്മദ് അമാന് മൊമെന്റോ സമര്‍പ്പണം നിര്‍വഹിച്ചു.
ചെറുപ്രായത്തില്‍ തന്നെ എഴുത്തിന്റെ മേഖലയിലേക്ക് അമാന് കടന്നുവന്നത് ഏറെ പ്രശംസനീയമാണെന്നും ഭാവിയില്‍ മികച്ചൊരു എഴുത്തുകാരനായി മാറാന്‍ അമാന് സാധിക്കട്ടെയെന്നും അദ്ദേഹം ആശംസിച്ചു. ചടങ്ങില്‍ എം. അഷ്‌റഫ്, മുഹമ്മദ് അമാന് രചിച്ച കൃതികള്‍ സദസ്സിന് പരിചയപ്പെടുത്തി.
വായനക്കാരില്‍ അനശ്വരമായ മൂല്യങ്ങള്‍ വളര്‍ത്തിയെടുക്കുന്ന കാര്യങ്ങളെക്കുറിച്ചാണ് താന്‍ എഴുതാറുള്ളതെന്നും, അവരെ നന്മയിലേക്ക് പ്രചോദിപ്പിക്കുകയാണ് എഴുത്തിലൂടെ ലക്ഷ്യമിടുന്നതെന്നും മറുപടി പ്രസംഗത്തില്‍ മുഹമ്മദ് അമാന് പറഞ്ഞു.
ചടങ്ങില്‍ മുഹ്‌സിന്‍ കാളികാവ്, അബ്ദുല്ല മുക്കണ്ണി, അമീന ബഷീര്‍ തുടങ്ങിയവര്‍ ആശംസകള്‍ നേര്‍ന്നു. ശിഹാബ് കരുവാരക്കുണ്ട്, ഇബ്രാഹീം ശംനാട് തുടങ്ങിയവര്‍ പരിപാടികള്‍ക്ക് നേതൃത്വം നല്‍കി.
.jpg)
Related News
