കരിപ്പൂര്: സംസ്ഥാന ഹജ്ജ് കമ്മിറ്റിക്ക് കീഴില് കോഴിക്കോട് എംബാര്ക്കേഷന് പോയിന്റിലെ ഹജ്ജ് ക്യാമ്പ് ഉദ്ഘാടനം പാണക്കാട് സയ്യിദ് സാദിഖലി ശിഹാബ് തങ്ങള് നിര്വഹിച്ചു. കരിപ്പൂര് ഹജ്ജ് ഹൗസില് നടന്ന ചടങ്ങില് സംസ്ഥാന ഹജ്ജ് കമ്മിറ്റി ചെയര്മാന് ഡോ. ഹുസൈന് സഖാഫി ചുള്ളിക്കോട് അധ്യക്ഷത വഹിച്ചു.
ഇത്തവണ കരിപ്പൂര് വഴി 969 തീര്ത്ഥാടകരാണ് യാത്രയാകുന്നത്. ഇതില് 686 സ്ത്രീകളും 283 പുരുഷന്മാരും ഉള്പ്പെടുന്നു. കര്ണാടകയില് നിന്നുള്ള നാല് തീര്ത്ഥാടകരും ഈ സംഘത്തിലുണ്ട്. ആകാശ എയര്ലൈന്സിന്റെ 145 പേര്ക്ക് യാത്ര ചെയ്യാവുന്ന ഏഴ് വിമാനങ്ങളാണ് സര്വീസ് നടത്തുന്നത്. മെയ് 14 മുതല് 17 വരെയാണ് വിമാനങ്ങള് ഷെഡ്യൂള് ചെയ്തിരിക്കുന്നത്. ആദ്യ വിമാനം നാളെ (വ്യാഴം) പുലര്ച്ചെ 12.20-നും രണ്ടാമത്തെ വിമാനം പുലര്ച്ചെ 2.25-നും പുറപ്പെടും.
ഉദ്ഘാടന ചടങ്ങില് ഇ.ടി. മുഹമ്മദ് ബഷീര് എം.പി, പി.വി. അബ്ദുല് വഹാബ് എം.പി, നിയുക്ത എം.എല്.എമാരായ ടി.പി. അഷ്റഫലി, ടി.വി. ഇബ്രാഹിം എന്നിവര് പങ്കെടുത്തു. ജില്ലാ പഞ്ചായത്ത് പ്രസിഡന്റ് പി.എ. ജബ്ബാര് ഹാജി, കൊണ്ടോട്ടി നഗരസഭാ ചെയര്മാന് യു.കെ. മുഹമ്മദ് ഷാ, കൊണ്ടോട്ടി ബ്ലോക്ക് പഞ്ചായത്ത് പ്രസിഡന്റ് പി.കെ.സി. അബ്ദുറഹിമാന്, കൗണ്സിലര് സക്കീന, ഹജ്ജ് കമ്മിറ്റി അംഗം അഡ്വ. പി. മൊയ്തീന് കുട്ടി എന്നിവരും സംസാരിച്ചു.
ഹജ്ജ് കമ്മിറ്റി അംഗങ്ങളായ പി. അബ്ദുറഹിമാന്, അനസ് ഹാജി, മുഹമ്മദ് റാഫി, ഷംസുദ്ദീന് അരിഞ്ചിറ, ആകാശ എയര് പ്രതിനിധി റിഷി കുമാര് തുടങ്ങിയവര് ചടങ്ങില് സംബന്ധിച്ചു. ഹാജിമാര്ക്കുള്ള യാത്രാരേഖകളുടെ കൈമാറ്റം ടി.പി. അഷ്റഫലി നിര്വഹിച്ചു. അഷ്കര് കോറാട് സ്വാഗതവും അസിസ്റ്റന്റ് സെക്രട്ടറി ജാഫര് കെ. കക്കൂത്ത് നന്ദിയും പറഞ്ഞു. തൊടിയൂര് മുഹമ്മദ് കുഞ്ഞി മൗലവി പ്രാര്ത്ഥനയ്ക്ക് നേതൃത്വം നല്കി.
തീര്ത്ഥാടകര്ക്കായി ഹജ്ജ് ഹൗസിലും വിമാനത്താവളത്തിലും വിപുലമായ സൗകര്യങ്ങളാണ് ഒരുക്കിയിരിക്കുന്നത്. ഇത്തവണ സംസ്ഥാനത്ത് നിന്ന് ആകെ 13,194 പേരാണ് ഹജ്ജിന് പോകുന്നത്. കൊച്ചി വഴി 7931 പേരും കണ്ണൂര് വഴി 4270 പേരും യാത്ര തിരിക്കും. അയല് സംസ്ഥാനങ്ങളില് നിന്നുള്ളവര് ഉള്പ്പെടെ ആകെ 13,851 തീര്ത്ഥാടകരാണ് കേരളത്തിലെ എംബാര്ക്കേഷന് കേന്ദ്രങ്ങളെ ആശ്രയിക്കുന്നത്.
