ചെന്നൈ: തമിഴ്നാട്ടില് ഭൂരിപക്ഷം തെളിയിക്കാന് നടന് വിജയ്യുടെ തമിഴക വെട്രി കഴകം (ടി.വി.കെ) കരുനീക്കങ്ങള് സജീവമാക്കി. നിര്ണ്ണായകമായ രാഷ്ട്രീയ നീക്കത്തില്, സി.പി.ഐയും സി.പി.എമ്മും വിജയ്യുടെ പാര്ട്ടിക്ക് വെള്ളിയാഴ്ച നിരുപാധിക പിന്തുണ പ്രഖ്യാപിച്ചു. ഇതോടെ സര്ക്കാര് രൂപീകരണത്തിന് ആവശ്യമായ മാന്ത്രിക സംഖ്യയിലേക്ക് ടി.വി.കെ കൂടുതല് അടുത്തു.
തിരഞ്ഞെടുപ്പില് ടി.വി.കെ 108 സീറ്റുകളാണ് നേടിയത് (വിജയ് മത്സരിച്ച രണ്ട് മണ്ഡലങ്ങളിലെയും വിജയം ഉള്പ്പെടെ). സഭയില് ഭൂരിപക്ഷം തെളിയിക്കാന് 118 എം.എല്.എമാരുടെ പിന്തുണയാണ് വേണ്ടത്. കോണ്ഗ്രസിന്റെ അഞ്ച് എം.എല്.എമാര് നേരത്തെ തന്നെ ടി.വി.കെയ്ക്ക് പിന്തുണ അറിയിച്ചിരുന്നു. പുതിയതായി സി.പി.ഐയുടെയും സി.പി.എമ്മിന്റെയും രണ്ടുവീതം എം.എല്.എമാര് കൂടി എത്തിയതോടെ വിജയ്ക്കൊപ്പമുള്ള അംഗങ്ങളുടെ എണ്ണം 117 ആയി ഉയര്ന്നു.
വി.സി.കെയുടെ തീരുമാനം നിര്ണ്ണായകം
ഇനി കേവലം ഒരാളുടെ പിന്തുണ കൂടി ലഭിച്ചാല് വിജയ്ക്ക് തമിഴ്നാട് മുഖ്യമന്ത്രിയായി അധികാരമേല്ക്കാം. രണ്ട് സീറ്റുകള് നേടിയ വിടുതലൈ ചിരുതൈകള് കക്ഷി (വി.സി.കെ) ടി.വി.കെ മുന്നണിയുടെ ഭാഗമാകുമെന്നാണ് സൂചന. വി.സി.കെയുടെ ഔദ്യോഗിക പ്രഖ്യാപനം ഉടനുണ്ടായേക്കും.
ഭൂരിപക്ഷം തെളിയിക്കുന്നതിന് ആവശ്യമായ 118 പേരുടെ പട്ടിക സമര്പ്പിക്കാതെ വിജയ്യുടെ അവകാശവാദം അംഗീകരിക്കാനാവില്ലെന്ന് ഗവര്ണര് രാജേന്ദ്ര അര്ലേക്കര് നിലപാടെടുത്തിരുന്നു. ഇതില് പ്രതിഷേധിച്ച് തമിഴ്നാട് കോണ്ഗ്രസ് സംസ്ഥാനവ്യാപകമായി പ്രതിഷേധ പ്രകടനങ്ങള് നടത്തി. വ്യക്തമായ ഭൂരിപക്ഷം ആര്ക്കുമില്ലാത്ത സാഹചര്യത്തില്, ചെറിയ പാര്ട്ടികളുടെ നിലപാടുകള് തമിഴ്നാട് രാഷ്ട്രീയത്തില് നിര്ണ്ണായകമാവുകയാണ്.
Related News
