കൊല്‍ക്കത്ത- പശ്ചിമ ബംഗാള്‍ നിയമസഭാ തിരഞ്ഞെടുപ്പിലെ ബിജെപിയുടെ ചരിത്രവിജയത്തിന് പിന്നാലെ സംസ്ഥാനത്തെ ആദ്യ മുഖ്യമന്ത്രിയെ കണ്ടെത്താനുള്ള ചര്‍ച്ചകള്‍ക്കായി കേന്ദ്ര ആഭ്യന്തര മന്ത്രി അമിത് ഷാ ഇന്ന് കൊല്‍ക്കത്തയിലെത്തും. മുഖ്യമന്ത്രി സ്ഥാനത്തേക്ക് അഗ്‌നിമിത്ര പോള്‍, രൂപ ഗാംഗുലി, സംസ്ഥാന അധ്യക്ഷന്‍ സമിക് ഭട്ടാചാര്യ തുടങ്ങിയവരുടെ പേരുകള്‍ ഉയര്‍ന്നു കേള്‍ക്കുന്നുണ്ടെങ്കിലും മുന്‍ പ്രതിപക്ഷ നേതാവ് സുവേന്ദു അധികാരിക്കാണ് മുന്‍തൂക്കം. ഭവാനിപൂരിലും നന്ദിഗ്രാമിലും മമത ബാനര്‍ജിയെ നേരിട്ട് പരാജയപ്പെടുത്തിയ 'ജയന്റ് കില്ലര്‍' എന്ന പ്രതിച്ഛായ സുവേന്ദുവിനെ പട്ടികയില്‍ മുന്നിലെത്തിക്കുന്നു. ഈ സാഹചര്യത്തില്‍ സുവേന്ദുവിനെ മുഖ്യമന്ത്രി സ്ഥാനത്തേക്ക് പരിഗണിക്കാതിരിക്കുന്നത് പാര്‍ട്ടിക്ക് വലിയൊരു രാഷ്ട്രീയ വെല്ലുവിളിയാകുമെന്നാണ് വിലയിരുത്തപ്പെടുന്നത്.
വര്‍ഷങ്ങളായി ബംഗാളിലെ തെരുവുകളില്‍ തൃണമൂല്‍ കോണ്‍ഗ്രസിനെതിരെ ബിജെപിയുടെ പോരാട്ടത്തിന് നേതൃത്വം നല്‍കിയത് സുവേന്ദു അധികാരിയാണ്. താഴേത്തട്ടിലുള്ള പാര്‍ട്ടി പ്രവര്‍ത്തകര്‍ക്കും പുതുതായി തിരഞ്ഞെടുക്കപ്പെട്ട ഭൂരിഭാഗം എംഎല്‍എമാര്‍ക്കും സുവേന്ദു മുഖ്യമന്ത്രിയാകണമെന്ന നിലപാടാണുള്ളത്. അദ്ദേഹത്തെ തഴഞ്ഞ് മറ്റൊരു നേതാവിനെ തലപ്പത്ത് കൊണ്ടുവന്നാല്‍, അത് തിരഞ്ഞെടുപ്പ് വിജയത്തിനായി ആവേശത്തോടെ പ്രവര്‍ത്തിച്ച അണികളുടെ ആത്മവീര്യം തകര്‍ക്കാന്‍ കാരണമാകും. പാര്‍ട്ടിയുടെ ആഭ്യന്തര സന്തുലിതാവസ്ഥയേക്കാള്‍ തിരഞ്ഞെടുപ്പിലെ പ്രകടനത്തിനും ജനകീയതയ്ക്കും മുന്‍ഗണന നല്‍കണമെന്ന വികാരമാണ് സംസ്ഥാനത്തെ ബിജെപി കേഡര്‍മാര്‍ക്കിടയിലുള്ളത്.
മുന്‍പ് തൃണമൂല്‍ കോണ്‍ഗ്രസ് പാര്‍ട്ടിക്കുള്ളിലെ കരുത്തുറ്റ നേതാവായിരുന്ന സുവേന്ദുവിന് ബംഗാളിലെ ഭരണയന്ത്രത്തെക്കുറിച്ചും ബ്യൂറോക്രസിയെക്കുറിച്ചും വ്യക്തമായ ധാരണയുണ്ട്. സമിക് ഭട്ടാചാര്യയെപ്പോലെയുള്ള നേതാക്കള്‍ക്ക് സംഘടനാപരമായ മികവുണ്ടെങ്കിലും സുവേന്ദുവിനുള്ളത് പോലെയുള്ള ജനസ്വാധീനമോ ഭരണപരിചയമോ അവര്‍ക്കില്ല. ബംഗാളിന് പുറത്തും അദ്ദേഹത്തിന്റെ സ്വാധീനം ശ്രദ്ധിക്കപ്പെട്ടിട്ടുണ്ട്. ബംഗ്ലാദേശിലെ ഭരണകക്ഷിയായ ബിഎന്‍പി നേതൃത്വം പോലും 'സുവേന്ദു അധികാരി നയിക്കുന്ന ബിജെപിക്ക്' വിജയാശംസകള്‍ നേര്‍ന്നത് ഇതിന് ഉദാഹരണമാണ്. സുവേന്ദുവിനെ മാറ്റിനിര്‍ത്തുന്നത് ബിജെപിക്ക് ബംഗാളില്‍ ലഭിച്ച ഈ രാഷ്ട്രീയ കുതിപ്പിനെ മന്ദീഭവിപ്പിക്കാന്‍ ഇടയാക്കും.
സമൂഹമാധ്യമങ്ങളിലും സുവേന്ദുവിനായി വലിയ പിന്തുണയാണ് ഉയരുന്നത്. മമതയുടെ ഭരണതന്ത്രങ്ങളും രഹസ്യങ്ങളും കൃത്യമായി അറിയുന്ന സുവേന്ദു തന്നെ മുഖ്യമന്ത്രിയാകണമെന്ന ആവശ്യം ബിജെപി അനുഭാവികള്‍ ശക്തമായി ഉന്നയിക്കുന്നുണ്ട്. വെള്ളിയാഴ്ച നടക്കുന്ന നിയമസഭാ കക്ഷി യോഗത്തില്‍ എംഎല്‍എമാരുടെ പിന്തുണ തേടിയ ശേഷമാകും അന്തിമ പ്രഖ്യാപനം ഉണ്ടാവുക. പാര്‍ട്ടിക്കുള്ളിലെ പഴയ തലമുറയിലെ ചില നേതാക്കള്‍ക്ക് സുവേന്ദുവിന്റെ കടന്നുവരവില്‍ നീരസമുണ്ടെങ്കിലും കേന്ദ്ര നേതൃത്വത്തിന്, പ്രത്യേകിച്ച് അമിത് ഷായ്ക്ക് അദ്ദേഹത്തിലുള്ള വിശ്വാസം വലിയ ഘടകമാണ്. സുവേന്ദുവിനെ മുഖ്യമന്ത്രിയാക്കിയാല്‍ മാത്രമേ ബംഗാളില്‍ ബിജെപി വിഭാവനം ചെയ്യുന്ന 'പരിവര്‍ത്തനം' അതിന്റെ പൂര്‍ണ്ണരൂപത്തില്‍ നടപ്പിലാക്കാന്‍ സാധിക്കൂ എന്നാണ് രാഷ്ട്രീയ നിരീക്ഷകര്‍ കരുതുന്നത്.
.jpg)
Related News
