കോഴിക്കോട്: ബേപ്പൂര്‍ മണ്ഡലത്തിലെ തിരഞ്ഞെടുപ്പ് ഫലത്തെച്ചൊല്ലി മന്ത്രി പി.എ. മുഹമ്മദ് റിയാസിനെതിരെ രൂക്ഷമായ വെല്ലുവിളിയുമായി പി.വി. അന്‍വര്‍. ബേപ്പൂരില്‍ റിയാസ് വിജയിക്കുകയാണെങ്കില്‍ താന്‍ തല മൊട്ടയടിച്ച് കമ്മലിട്ട് മിഠായിത്തെരുവിലൂടെ നടക്കുമെന്നാണ് അന്‍വര്‍ പ്രഖ്യാപിച്ചത്. ഫറോക്കില്‍ നടന്ന വാര്‍ത്താ സമ്മേളനത്തിലായിരുന്നു അന്‍വറിന്റെ പരസ്യ വെല്ലുവിളി. സമാനമായ രീതിയില്‍ വെല്ലുവിളി ഏറ്റെടുക്കാന്‍ റിയാസ് തയ്യാറുണ്ടോ എന്നും അദ്ദേഹം ചോദിച്ചു. മണ്ഡലത്തിലെ ന്യൂനപക്ഷ വോട്ടുകള്‍ തനിക്ക് അനുകൂലമാകുമെന്നും ഇത്തവണ യുഡിഎഫ് 86 സീറ്റുകള്‍ നേടി അധികാരത്തില്‍ വരുമെന്നും അന്‍വര്‍ അവകാശപ്പെട്ടു.
മുഖ്യമന്ത്രി പിണറായി വിജയന്റെ ഏകാധിപത്യ രീതികളും മുഹമ്മദ് റിയാസിന്റെ അമിത ഇടപെടലുകളുമാണ് സിപിഎമ്മിന്റെ തകര്‍ച്ചയ്ക്ക് കാരണമെന്ന് അന്‍വര്‍ വിമര്‍ശിച്ചു. പാര്‍ട്ടി നേതൃത്വത്തെ റിയാസ് ഹൈജാക്ക് ചെയ്തിരിക്കുകയാണെന്നും ഇതിന് പാര്‍ട്ടി സെക്രട്ടറി കൂട്ടുനില്‍ക്കുകയാണെന്നും അദ്ദേഹം കുറ്റപ്പെടുത്തി. ബംഗാളിലെയും ത്രിപുരയിലെയും പോലെ കേരളത്തിലും കമ്മ്യൂണിസ്റ്റ് പാര്‍ട്ടി അധഃപതനത്തിന്റെ പാതയിലാണെന്നും പാര്‍ട്ടിയിലെ കുടുംബാധിപത്യത്തിനെതിരെ അണികള്‍ക്കിടയില്‍ വലിയ പ്രതിഷേധമുണ്ടെന്നും അന്‍വര്‍ ചൂണ്ടിക്കാട്ടി.
തിരഞ്ഞെടുപ്പില്‍ ബിജെപിയും സിപിഎമ്മും തമ്മിലുള്ള ഡീല്‍ ഇത്തവണ പൊളിഞ്ഞതായി അന്‍വര്‍ ആരോപിച്ചു. ശബരിമല വിഷയം തിരഞ്ഞെടുപ്പില്‍ വലിയ സ്വാധീനം ചെലുത്തിയിട്ടുണ്ടെന്നും കേരള കോണ്‍ഗ്രസ് (എം) ഈ തിരഞ്ഞെടുപ്പോടെ തകരുമെന്നും അദ്ദേഹം പറഞ്ഞു. ജനവികാരം പിണറായി വിജയന് എതിരാണെന്നും എക്‌സിറ്റ് പോള്‍ ഫലങ്ങള്‍ തന്റെ നിരീക്ഷണങ്ങളെ ശരിവെക്കുന്നതാണെന്നും അന്‍വര്‍ കൂട്ടിച്ചേര്‍ത്തു. വെള്ളാപ്പള്ളി നടേശനെയും മുഖ്യമന്ത്രിയെയും വാര്‍ത്താ സമ്മേളനത്തില്‍ അന്‍വര്‍ രൂക്ഷമായി വിമര്‍ശിച്ചു.
Related News
