തെഹ്റാന്/അന്റാലിയ: ലോകത്തിന്റെ എണ്ണ വിതരണ പാതയായ ഹോര്മുസ് കടലിടുക്കില് ഇറാനും അമേരിക്കയും തമ്മിലുള്ള പോര് കടുക്കുന്നു. വെടിനിര്ത്തലിനെത്തുടര്ന്ന് കപ്പല് ഗതാഗതത്തിനായി കടലിടുക്ക് ഭാഗികമായി തുറന്നുകൊടുത്ത ഇറാന്, യുഎസ് നാവിക ഉപരോധത്തില് പ്രതിഷേധിച്ച് നിയന്ത്രണങ്ങള് വീണ്ടും കര്ശനമാക്കാന് ഒരുങ്ങുന്നതായാണ് ഏറ്റവും പുതിയ റിപ്പോര്ട്ടുകള്.
ഇറാന്റെ പക്കലുള്ള സമ്പുഷ്ടീകരിച്ച യൂറേനിയം അമേരിക്കയ്ക്ക് കൈമാറില്ലെന്ന് ഇറാന് ഉപവിദേശകാര്യ മന്ത്രി സയീദ് ഖത്തീബ്സാദെ വ്യക്തമാക്കി. ഇറാന്റെ ആണവ കേന്ദ്രങ്ങളില് നിന്ന് യൂറേനിയം ശേഖരിക്കുമെന്ന അമേരിക്കന് പ്രസിഡന്റ് ഡൊണാള്ഡ് ട്രംപിന്റെ പ്രസ്താവന അദ്ദേഹം തള്ളി. അമേരിക്ക തങ്ങളുടെ കടുത്ത നിലപാടുകളില് നിന്ന് പിന്നോട്ടുപോകാത്ത സാഹചര്യത്തില് യുഎസുമായി നേരിട്ടുള്ള ചര്ച്ചകള്ക്ക് ഇറാന് തയ്യാറല്ലെന്നും തുര്ക്കിയിലെ അന്റാലിയയില് അദ്ദേഹം മാധ്യമങ്ങളോട് പറഞ്ഞു.
മധ്യസ്ഥ ശ്രമങ്ങളുമായി ഈജിപ്തും പാകിസ്ഥാനും
അമേരിക്കയും ഇറാനും തമ്മിലുള്ള അന്തിമ കരാറിനായി ഈജിപ്തും പാകിസ്ഥാനും തീവ്രശ്രമം തുടരുകയാണ്. വരും ദിവസങ്ങളില് തന്നെ ഒരു സമാധാന കരാറില് എത്താന് സാധിക്കുമെന്ന് പ്രതീക്ഷിക്കുന്നതായി ഈജിപ്ത് വിദേശകാര്യ മന്ത്രി ബദര് അബ്ദെലാറ്റി പറഞ്ഞു. യുഎസും ഇറാനും തമ്മിലുള്ള അഭിപ്രായ വ്യത്യാസങ്ങള് പരിഹരിക്കാന് പാകിസ്ഥാന് നയതന്ത്രജ്ഞര് ശ്രമിക്കുന്നതായി പാക് വിദേശകാര്യ മന്ത്രി ഇഷാഖ് ദാറും വ്യക്തമാക്കി. കഴിഞ്ഞ ആഴ്ച ഇസ്ലാമാബാദില് നടന്ന ചര്ച്ചകളില് ഇരുരാജ്യങ്ങളും കരാറിനോട് ഏറെ അടുത്തിരുന്നതായും അദ്ദേഹം സൂചിപ്പിച്ചു.
കപ്പല് ഗതാഗതത്തില് ആശയക്കുഴപ്പം
ഇന്നലെ ഉച്ചയോടെ കടലിടുക്ക് തുറന്നതിനെത്തുടര്ന്ന് എട്ട് എണ്ണ-വാതക ടാങ്കറുകള് ഹോര്മുസ് കടലിടുക്ക് മുറിച്ചുകടന്നതായി മാരിടൈം ട്രാക്കിംഗ് ഡാറ്റ വ്യക്തമാക്കുന്നു. എന്നാല്, യുഎസ് നാവിക ഉപരോധം തുടരുന്നതില് പ്രതിഷേധിച്ച് കടലിടുക്കില് വീണ്ടും 'കര്ശന നിയന്ത്രണം' ഏര്പ്പെടുത്തുമെന്ന് ഇറാന്റെ സെന്ട്രല് മിലിട്ടറി കമാന്ഡ് ഇന്ന് അറിയിച്ചു.
Related News
