റിയാദ്: സൗദി അറേബ്യയിലെ ജനങ്ങളുടെ ആരോഗ്യസ്ഥിതിയും ചികിത്സാ ആവശ്യങ്ങളും കൃത്യമായി മനസ്സിലാക്കുന്നതിനായി 'ദേശീയ ആരോഗ്യ സര്‍വേ' ആരംഭിച്ചു. ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് കഴിഞ്ഞ ദിവസമാണ് ഈ ബൃഹദ് പദ്ധതിക്ക് തുടക്കം കുറിച്ചത്. സാമൂഹിക പശ്ചാത്തലം, വ്യക്തിഗത ശീലങ്ങള്‍, ആരോഗ്യ സേവനങ്ങളുടെ ലഭ്യത എന്നിവ പൊതുജനാരോഗ്യത്തെ എങ്ങനെ സ്വാധീനിക്കുന്നുവെന്ന് പഠിക്കുകയാണ് സര്‍വേയുടെ പ്രധാന ലക്ഷ്യം.

15 വയസ്സും അതിനുമുകളിലും പ്രായമുള്ള മുതിര്‍ന്നവരെയാണ് ഈ സര്‍വേയില്‍ പ്രധാനമായും ഉള്‍പ്പെടുത്തിയിരിക്കുന്നത്. രാജ്യത്തെ തൊഴില്‍ മേഖലയിലുള്ളവര്‍ ഉള്‍പ്പെടെയുള്ളവരുടെ ആരോഗ്യ സ്വഭാവങ്ങള്‍ വിശകലനം ചെയ്യുക. ആരോഗ്യ സേവനങ്ങളുടെ ഗുണനിലവാരം, അവ സാധാരണക്കാര്‍ക്ക് ലഭ്യമാണോ, ചികിത്സാ ചിലവ് താങ്ങാനാവുന്നുണ്ടോ തുടങ്ങിയ കാര്യങ്ങള്‍ ഇതിലൂടെ പരിശോധിക്കും.

സര്‍വേയില്‍ നിന്ന് ലഭിക്കുന്ന വിവരങ്ങള്‍ വരുംകാല പൊതുജനാരോഗ്യ നയങ്ങള്‍ രൂപീകരിക്കുന്നതിനും തൊഴിലാളികളുടെ സുരക്ഷാ പദ്ധതികള്‍ ആവിഷ്‌കരിക്കുന്നതിനും സര്‍ക്കാര്‍ ഉപയോഗിക്കും. ദേശീയ ആരോഗ്യ സര്‍വേയോടൊപ്പം 'സ്ത്രീകളുടെയും കുട്ടികളുടെയും ആരോഗ്യ സര്‍വേ'യും അതോറിറ്റി പ്രഖ്യാപിച്ചിട്ടുണ്ട്. 15 മുതല്‍ 49 വയസ്സ് വരെയുള്ള സ്ത്രീകള്‍, 14 വയസ്സ് വരെയുള്ള കുട്ടികള്‍ എന്നിവരെ കേന്ദ്രീകരിച്ചാണ് ഈ പഠനം.

സ്ത്രീകളുടെയും കുട്ടികളുടെയും ആരോഗ്യത്തെ ബാധിക്കുന്ന സാമൂഹിക-സാമ്പത്തിക ഘടകങ്ങള്‍, പരിസ്ഥിതി പ്രശ്‌നങ്ങള്‍, ജീവിതശൈലിയിലെ വെല്ലുവിളികള്‍ എന്നിവ സര്‍വേ വിശകലനം ചെയ്യും. സാംസ്‌കാരികമോ സാമ്പത്തികമോ ആയ കാരണങ്ങളാല്‍ ആര്‍ക്കെങ്കിലും ചികിത്സാ സൗകര്യങ്ങള്‍ നിഷേധിക്കപ്പെടുന്നുണ്ടോ എന്ന് ഈ സര്‍വേയിലൂടെ കണ്ടെത്താനാകും.

നയരൂപകര്‍ത്താക്കള്‍ക്കും ആരോഗ്യ സേവന ദാതാക്കള്‍ക്കും സന്നദ്ധ സംഘടനകള്‍ക്കും കൃത്യമായ വിവരങ്ങള്‍ ലഭ്യമാക്കുന്നതിലൂടെ രാജ്യത്തെ സ്ത്രീകളുടെയും കുട്ടികളുടെയും ആരോഗ്യനിലവാരം മെച്ചപ്പെടുത്താന്‍ സാധിക്കുമെന്ന് അധികൃതര്‍ പ്രത്യാശ പ്രകടിപ്പിച്ചു.