റിയാദ്: സൗദി അറേബ്യയിലെ സ്വകാര്യ സ്ഥാപനങ്ങളില്‍ ജോലി ചെയ്യുന്ന ജീവനക്കാരുടെ തൊഴില്‍ കരാറുകള്‍ ഖിവ പ്ലാറ്റ്ഫോം വഴി ഡിജിറ്റലായി രേഖപ്പെടുത്തുന്നതിനുള്ള വ്യവസ്ഥകള്‍ പരിഷ്‌കരിച്ചു. ഇതിനായുള്ള കംപ്ലയന്‍സ് റേറ്റ് (പാലിക്കല്‍ നിരക്ക്) ഏപ്രില്‍ 30 മുതല്‍ 85 ശതമാനമായി വര്‍ദ്ധിപ്പിച്ചതായി മാനവശേഷി-സാമൂഹിക വികസന മന്ത്രാലയം അറിയിച്ചു.

സമാന്തരമായുള്ള രണ്ടാം ഘട്ടത്തില്‍, ജൂണ്‍ 30-ഓടെ കംപ്ലയന്‍സ് റേറ്റ് 90 ശതമാനമായി ഉയര്‍ത്തുകയാണ് ലക്ഷ്യം. ഒരു സ്ഥാപനത്തിലെ ആകെ ജീവനക്കാരുടെ എണ്ണവും ഖിവ പ്ലാറ്റ്ഫോമില്‍ രേഖപ്പെടുത്തിയ കരാറുകളുടെ എണ്ണവും താരതമ്യം ചെയ്താണ് ഈ നിരക്ക് നിശ്ചയിക്കുന്നത്. ഇതുവഴി തൊഴിലുടമകള്‍ക്ക് തങ്ങളുടെ സ്ഥാപനത്തിന്റെ കൃത്യമായ പ്രകടനം നിരീക്ഷിക്കാന്‍ സാധിക്കും.

തൊഴില്‍ നിയമങ്ങള്‍ കര്‍ശനമായി പാലിക്കുന്നുവെന്ന് ഉറപ്പാക്കുക, സുതാര്യത വര്‍ദ്ധിപ്പിക്കുക, തൊഴിലുടമയുടെയും തൊഴിലാളിയുടെയും അവകാശങ്ങള്‍ സംരക്ഷിക്കുക എന്നിവയാണ് മന്ത്രാലയം ഇതിലൂടെ ലക്ഷ്യമിടുന്നത്.

രേഖപ്പെടുത്താത്ത കരാറുകള്‍ എത്രയും വേഗം പരിശോധിക്കാനും ഖിവ പ്ലാറ്റ്ഫോമിലൂടെ അവ പൂര്‍ത്തിയാക്കാനും മന്ത്രാലയം എല്ലാ സ്ഥാപനങ്ങളോടും ആവശ്യപ്പെട്ടു. നിശ്ചിത നിരക്ക് കൈവരിക്കാത്ത സ്ഥാപനങ്ങള്‍ക്ക് കംപ്ലയന്‍സ് ഇന്‍ഡിക്കേറ്ററുകളുമായി ബന്ധപ്പെട്ട സേവനങ്ങള്‍ തടസ്സപ്പെടാന്‍ സാധ്യതയുണ്ടെന്നും മന്ത്രാലയം മുന്നറിയിപ്പ് നല്‍കി.