വാഷിംഗ്ടണ്: ഹോര്മുസ് കടലിടുക്ക് തുറക്കുന്നതുമായി ബന്ധപ്പെട്ട് അമേരിക്ക നല്കിയ സമയപരിധി അവസാനിക്കാന് മണിക്കൂറുകള് ബാക്കിനില്ക്കെ, ഇറാന് കടുത്ത ഭീഷണിയുമായി പ്രസിഡന്റ് ഡൊണാള്ഡ് ട്രംപ്. ഉടമ്പടിക്ക് തയ്യാറായില്ലെങ്കില് 'ഒരു നാഗരികത തന്നെ ഇന്ന് രാത്രി മരിക്കും' എന്ന് ട്രംപ് മുന്നറിയിപ്പ് നല്കി. വാഷിംഗ്ടണ് സമയം ചൊവ്വാഴ്ച രാത്രി 8 മണിയോടെ (ഇന്ത്യന് സമയം ബുധനാഴ്ച പുലര്ച്ചെ) ട്രംപിന്റെ അന്ത്യശാസനത്തിന്റെ സമയപരിധി അവസാനിക്കും.
തന്റെ സോഷ്യല് മീഡിയ പ്ലാറ്റ്ഫോമായ 'ട്രൂത്ത് സോഷ്യല്' വഴിയാണ് ട്രംപ് ഈ വിവാദ പ്രസ്താവന നടത്തിയത്. 'ഒരിക്കലും തിരിച്ചുകൊണ്ടുവരാന് കഴിയാത്ത വിധം ഒരു നാഗരികത മുഴുവന് ഇന്ന് രാത്രി ഇല്ലാതാകും. അങ്ങനെ സംഭവിക്കണമെന്ന് ഞാന് ആഗ്രഹിക്കുന്നില്ല, പക്ഷേ മിക്കവാറും അത് സംഭവിച്ചേക്കാം,' ട്രംപ് കുറിച്ചു. ലോകത്തിന്റെ ദീര്ഘവും സങ്കീര്ണ്ണവുമായ ചരിത്രത്തിലെ ഏറ്റവും പ്രധാനപ്പെട്ട നിമിഷങ്ങളിലൊന്നിനാണ് ഇന്ന് രാത്രി സാക്ഷ്യം വഹിക്കാന് പോകുന്നതെന്നും അദ്ദേഹം കൂട്ടിച്ചേര്ത്തു.
ഭീഷണി മുഴക്കുമ്പോഴും നയതന്ത്രപരമായ ഒരു പരിഹാരത്തിനുള്ള സാധ്യത ട്രംപ് പൂര്ണ്ണമായും തള്ളിക്കളഞ്ഞിട്ടില്ല. 'വിപ്ലവകരവും അത്ഭുതകരവുമായ എന്തെങ്കിലും ഒരുപക്ഷേ സംഭവിച്ചേക്കാം' എന്ന് അദ്ദേഹം സൂചിപ്പിച്ചു. ഹോര്മുസ് കടലിടുക്ക് തുറന്നുനല്കാനും ഉടമ്പടികള്ക്ക് വഴങ്ങാനും ഇറാന് തയ്യാറായാല് മാത്രമേ ഈ 'അത്ഭുതം' സംഭവിക്കൂ എന്നാണ് വൈറ്റ് ഹൗസ് നല്കുന്ന സൂചന.
ഹോര്മുസ് കടലിടുക്കിലെ ഉപരോധം നീക്കിയില്ലെങ്കില് ഇറാന്റെ പവര് പ്ലാന്റുകളും പ്രധാന അടിസ്ഥാന സൗകര്യങ്ങളും ബോംബിട്ട് തകര്ക്കുമെന്ന് ട്രംപ് നേരത്തെ വ്യക്തമാക്കിയിരുന്നു. ട്രംപിന്റെ സമയപരിധി അവസാനിക്കാന് ഇനിയുള്ള ഏതാനും മണിക്കൂറുകള് ആഗോള രാഷ്ട്രീയത്തിലും സാമ്പത്തിക രംഗത്തും വലിയ പ്രത്യാഘാതങ്ങള് ഉണ്ടാക്കുമെന്ന ഭീതിയിലാണ് ലോകരാജ്യങ്ങള്. ഇറാന് ഇതിനോട് എങ്ങനെ പ്രതികരിക്കുമെന്നതിനെ ആശ്രയിച്ചിരിക്കും മേഖലയിലെ സമാധാനം.
Related News
