ദമാം: വ്യവസായ വാണിജ്യ രംഗത്തെ പ്രമുഖരായ യുണൈറ്റഡ് എ ആര് കെ ഗ്രൂപ്പിന്റെ കീഴിലുള്ള ക്ലബ് യുണൈറ്റഡ് അല് കോബാര് ഗൊസൈബി സ്റ്റേഡിയത്തില് സംഘടിപ്പിച്ച് വന്ന വിന്റര് കപ്പിന് ഉജ്ജ്വല സമാപനം. മൂന്ന് വരാന്ത്യങ്ങളിലായി സംഘടിപ്പിച്ച ഫുട്ബോള് മേളയില് പ്രമുഖ താരങ്ങള് വിവിധ ടീമുകള്ക്ക് വേണ്ടി ബൂട്ടണിഞ്ഞു. ഗ്രൂപ്പിന് കീഴിലുള്ള വിവിധ സ്ഥാപനങ്ങളെ 10 ടീമുകളായി തിരിച്ചാണ് ഫുട്ബോള് ടൂര്ണമെന്റ് സംഘടിപ്പിച്ചത്.
വീറും ആവേശവും സമ്മാനിച്ച ഫുട്ബോള് മേളയുടെ കാലാശപ്പോരാട്ടത്തില് ഇറാം സ്ട്രൈക്കേഴ്സും ക്ലബ് ദാര് അസ്സിഹയും തമ്മില് മാറ്റുരച്ചു. ഏകപക്ഷീയമായ ഒരു ഗോളിന് ക്ലബ് ദാര് അസ്സിഹയെ പരാജയപ്പെടുത്തി ഇറാം സ്ട്രൈക്കേഴ്സ് കിരീടം സ്വന്തമാക്കി. കളിയുടെ ഇരുപത്തി ഏഴാം മിനുട്ടില് ആദിന് അമ്പാടി നേടിയ ഗോളിനാണ് ഇറാം സ്ട്രൈക്കേഴ്സ് വിജയം കിരീടം ചൂടിയത്. ഇറാം ഹോള്ഡിങ്സ് സി എം ഡി ഡോ: സിദ്ദീഖ് അഹ്മ്മദ്, എ.ആര്.കെ ഗ്രൂപ്പ് എം ഡി ഡോ: ഹസ്സന് മുഹമ്മദ് എന്നിവര് ചേര്ന്ന് ട്രോഫി സമ്മാനിച്ചു.
ഇറാം ഹോള്ഡിങ്സ് സി.ഇ ഒ അബ്ദുല് റസാക് ടൂര്ണമെന്റിന്റെ കിക്കോഫ് നിര്വ്വഹിച്ചു. ഇറാം ഹോള്ഡിങ്സിന്റെ സാരഥികളായ മുഹമ്മദ് അല് തുവൈജിരി, മധു കൃഷ്ണന്, സതാം അല് ഒമൈരി, ബഷീര് അഹ് മദ്, ഫഹദ് അല് തുവൈജിരി എന്നിവര് പരിപാടിയില് മുഖ്യാതിഥികളായിരുന്നു. കുടുംബിനികളും കുട്ടികളുമടക്കം നിരവധി പേര് ഫൈനല് പോരാട്ടത്തിന് ആവേശം പകരാന് സ്റ്റേഡിയത്തിലെത്തി. ഫൈസല് കാളികാവ്, നിസാം ചെമ്മാട് , സുബൈര് കതായിക്കല്, ഫൈസല് കുന്നത്ത്, സാജന് പി വി, അജ്മല് ആദം, ഇര്ഷാദ് കെ പി , അഫ്സല് കലാം എന്നിവര് സംഘാടനത്തിന് നേതൃത്വം നല്കി.
പടം : അല് കോബാറില് സംഘടിപ്പിച്ച് വന്ന ക്ലബ് യുണൈറ്റഡ് വിന്റര് കപ്പില് വിജയികളായ ഇറാം സ്ട്രൈക്കേഴ്സിന് ഡോ: സിദ്ദീഖ് അഹ്മ്മദ് , ഡോ: ഹസ്സന് മുഹമ്മദ് എന്നിവര് ചേര്ന്ന് ട്രോഫി സമ്മാനിക്കുന്നു.
