ജിദ്ദ- വിവിധ രാജ്യങ്ങളില്‍നിന്നുള്ള ഇന്റര്‍നാഷണല്‍ സ്‌കൂളുകളെ പങ്കെടുപ്പിച്ച് ഗൂഗ്‌ളീസ് ക്ലബ് സംഘടിപ്പിച്ച മാക്‌സിസ് ഗൂഗ്‌ളീസ് ഇന്റര്‍നാഷണല്‍ സ്‌കൂള്‍ ഫുട്‌ബോള്‍ ടൂര്‍ണമെന്റ് സീസണ്‍-2 വില്‍ ഇന്റര്‍നാഷണല്‍ ഇന്ത്യന്‍ സ്‌കൂള്‍ ടീമുകള്‍ മേധാവിത്വം ഉറപ്പിച്ചു. 13, 16, 18 എന്നീ മൂന്ന് വിഭാഗങ്ങളിലായി നടത്തിയ മത്സരത്തില്‍ മൂന്നു വിഭാഗത്തിലും ഇന്റര്‍നാഷണല്‍ ഇന്ത്യന്‍ സ്‌കൂള്‍ ടീമുകളാണ് വിജയം നേടിയത്.

ഇന്ത്യ, ശ്രീലങ്ക, ഇന്തോനേഷ്യ, ഫിലിപ്പൈന്‍സ് സ്‌കൂളുകളില്‍ നിന്നുള്ള ടീമുകളും ജിദ്ദയിലെ വിവിധ ഇന്റര്‍നാഷനല്‍ സ്‌കൂളുകളും ടൂര്‍ണമെന്റില്‍ പങ്കെടുത്തു. നവംബര്‍ 14, 21 തീയതികളില്‍ നടന്ന പ്രാഥമിക മത്സരങ്ങള്‍ക്ക് പിന്നാലെ, ഫൈനല്‍ മത്സരങ്ങള്‍ നവംബര്‍ 28 വെള്ളിയാഴ്ച അല്‍ മഹര്‍ സ്റ്റേഡിയത്തിലാണ് നടന്നത്.

18 വയസ് വിഭാഗത്തില്‍ അല്‍ ഹുകാമ ഇന്റര്‍നാഷണല്‍ സ്‌കൂളിനെയും (3-0) 16 വയസ് വിഭാഗത്തില്‍ അല്‍ മവാരിദ് ഇന്റര്‍നാഷണല്‍ സ്‌കൂളിനെയും (3-1) 13 വയസ് വിഭാഗത്തില്‍ നോവല്‍ ഇന്റര്‍നാഷണല്‍ സ്‌കൂളിനെയുമാണ് (5-0) ഇന്റര്‍നാഷണല്‍ ഇന്ത്യന്‍ സ്‌കൂള്‍ പരാജയപ്പെടുത്തിയത്.

വിജയികള്‍ക്കുള്ള ട്രോഫി മാക്‌സിസ് ടയേഴ്സ്, മൈഡു ട്രേഡിങ് കമ്പനി, അല്‍ അബീര്‍ ഹോസ്പിറ്റല്‍, ടി.ഡബ്ല്യു.സി. ഷിപ്പിംഗ് കമ്പനി, ക്രീയേറ്റീവ് ഇവന്റ്, സൂറത്ത് സൂപ്പര്‍മാര്‍ക്കറ്റ്, സഫിയ ട്രാവല്‍സ് എന്നിവയുടെ പ്രതിനിധികള്‍ വിതരണം ചെയ്തു. സമാപന ചടങ്ങില്‍ ജിദ്ദയിലെ സാമൂഹിക, സാംസ്‌കാരിക, വിദ്യാഭ്യാസ രംഗത്തെ പ്രമുഖ വ്യക്തികള്‍ പങ്കെടുത്തു.