ചെന്നൈ: വാട്ട്സ്ആപ്പിന് വെല്ലുവിളിയായി സോഹോ (Zoho) തദ്ദേശീയമായി നിര്‍മ്മിച്ച മെസേജിംഗ് ആപ്പായ 'അറട്ടൈ'യുടെ പേര് മാറ്റണമെന്ന വിവാദം കനക്കുന്നതിനിടെ, പേര് മാറ്റാന്‍ ഉദ്ദേശിക്കുന്നില്ലെന്ന് സ്ഥാപകന്‍ ശ്രീധര്‍ വെമ്പു വ്യക്തമാക്കി. ഉത്തരേന്ത്യന്‍ ഉപയോക്താക്കള്‍ക്ക് ഉച്ചരിക്കാന്‍ ബുദ്ധിമുട്ടാണ് എന്ന കാരണത്താല്‍ പേര് മാറ്റണമെന്ന് സമൂഹമാധ്യമങ്ങളില്‍ ആവശ്യം ഉയര്‍ന്നിരുന്നു. 'അറട്ടൈ' എന്ന വാക്കിന് തമിഴില്‍ 'സംസാരം' അല്ലെങ്കില്‍ 'ചാറ്റ്' എന്നാണര്‍ത്ഥം.

'അറട്ടൈ' എന്നത് ചാറ്റിങ്ങിനുള്ള ഒരു ലളിതമായ ഉല്‍പ്പന്നമായി തോന്നാമെങ്കിലും, സോഹോയുടെ 'സ്വദേശി കാഴ്ചപ്പാടാണ്' ഇതിന് പിന്നിലെന്ന് അദ്ദേഹം വ്യക്തമാക്കി. ഒരു ഇന്ത്യന്‍ കമ്പനിക്ക് അവരുടെ ഉല്‍പ്പന്നത്തിന് പ്രാദേശിക ഭാഷാപരമായ പേര് നല്‍കാനുള്ള അവകാശത്തെയാണ് ഈ വിവാദം ചോദ്യം ചെയ്യുന്നതെന്ന് വിവാദത്തെ തള്ളിക്കളഞ്ഞുകൊണ്ട്് വെമ്പു പറഞ്ഞു.

ആമസോണ്‍ വെബ് സര്‍വീസസ് (AWS), അസൂര്‍ (Azure), ഗൂഗിള്‍ ക്ലൗഡ് (Google Cloud) പോലുള്ള ആഗോള ക്ലൗഡ് പ്ലാറ്റ്ഫോമുകളില്‍ ആശ്രയിക്കാതെ, സ്വന്തമായി വികസിപ്പിച്ച സാങ്കേതിക വിദ്യയുടെ പിന്‍ബലത്തിലാണ് 'അറട്ടൈ' പ്രവര്‍ത്തിക്കുന്നത്. കേവലം 'ചാറ്റ്' എന്നതിലുപരി, ഇന്ത്യയുടെ സാങ്കേതിക സ്വാശ്രയത്വമാണ് ഈ ആപ്പ് ലക്ഷ്യമിടുന്നത്. തമിഴ്‌നാട് അടക്കമുള്ള ഇന്ത്യന്‍ ഗ്രാമങ്ങളില്‍ നിന്നുള്ള പ്രതിഭകളെ ഉപയോഗിച്ച് ആഗോള നിലവാരമുള്ള സാങ്കേതികവിദ്യ കെട്ടിപ്പടുക്കാനുള്ള സോഹോ കോര്‍പ്പറേഷന്റെ ശ്രമങ്ങളുടെ പ്രതീകമായി 'അറട്ടൈ' എന്ന പേര് തുടരുമെന്നും, പേര് മാറ്റാന്‍ ഉദ്ദേശിക്കുന്നില്ലെന്നും വെമ്പു ആവര്‍ത്തിച്ചു.

രണ്ടു പതിറ്റാണ്ടിലേറെയുള്ള സോഹോയുടെ എഞ്ചിനീയറിംഗ്, ഗവേഷണ വൈദഗ്ദ്ധ്യം ഈ ആപ്പിന്റെ വിജയത്തിന് പിന്നിലുണ്ട്. എന്‍ഡ്-ടു-എന്‍ഡ് എന്‍ക്രിപ്ഷന്‍, ഗ്രൂപ്പ് കോളിംഗ്, മള്‍ട്ടി-ലാംഗ്വേജ് യു.ഐ പിന്തുണ തുടങ്ങിയ ഒട്ടേറെ സവിശേഷതകളുമായാണ് 'അറട്ടൈ' അവതരിപ്പിച്ചിരിക്കുന്നത്.