ദോഹ: ഭാവനകള്‍ക്ക് വര്‍ണരാജിയൊരുക്കി കലാസ്വാദകരെ വിസ്മയിപ്പിച്ച അനശ്വര ഇന്ത്യന്‍ ചിത്രകാരന്‍ എം എഫ് ഹുസൈന് സ്മാരകമൊരുക്കി ഖത്തര്‍. മഖ്ബൂല്‍ ഫിദാ ഹുസൈന് എന്ന എം എഫ് ഹുസൈന് വേണ്ടി ഖത്തര്‍ ഫൗണ്ടേഷന്‍ എജ്യുക്കേഷന്‍ സിറ്റിയില്‍ ഒരുക്കിയ മ്യൂസിയം നവംബര്‍ 28ന് തുറക്കും.
ലോക ചിത്രകലയുടെ മുഖമായി മാറിയ കലാകാരന്റെ കലാ-സാംസ്‌കാരിക ജീവിതവും പ്രവര്‍ത്തനങ്ങളും ഖത്തറിന്റെ സാംസ്‌കാരിക ഭൂപടത്തില്‍ കൂട്ടിച്ചേര്‍ക്കുന്നതിന്റെ ഭാഗമായാണ് ' ലാഹ് വാ ഖലം' എന്ന പേരില്‍ മ്യൂസിയം ഒരുക്കിയിരിക്കുന്നത്. കല, സംസ്‌കാരം, പൈതൃകം, സാസ്‌കാരിക നവീകരണം എന്നിവയാണ് മ്യൂസിയത്തിന്റെ മുഖ്യലക്ഷ്യം. പഠനത്തിനൊപ്പം സര്‍ഗാത്മക കൂട്ടായ്മയും സംവാദവും വളര്‍ത്തിയെടുക്കാനുള്ള ഇടമായും മ്യൂസിയത്തെ മാറ്റിയെടുക്കും. എം എഫ് ഹുസൈന്റെ ജീവിതവും സര്‍ഗാത്മക ചിന്തകളും ആഴത്തില്‍ അടുത്തറിയാനും മ്യൂസിയം വഴിയൊരുക്കും.
ദോഹ ഹോട്ടല്‍ ബുക്കിംഗ്
മള്‍ട്ടിമീഡിയ സങ്കേതം വഴിയുള്ള കഥ പറയല്‍, പെയിന്റിംഗുകള്‍, സിനിമകള്‍, ടേപ്പ്‌സ്ട്രി, ഫോട്ടോഗ്രാഫി, കവിത എന്നിവയുള്‍പ്പെടെയുള്ള കലാരൂപങ്ങളിലൂടെ ഹുസൈന്റെ സര്‍ഗാത്മക ജീവിതം ആസ്വാദകര്‍ക്ക് മനസിലാക്കാം. ഖത്തര്‍ ഫൗണ്ടേഷന്‍ ചെയര്‍പേഴ്‌സണ്‍ ഷെയ്ഖ മോസ ബിന്‍ത് നാസര്‍, അറബ് നാഗരികതയില്‍ നിന്ന് പ്രചോദനം ഉള്‍ക്കൊണ്ട് ചിത്രങ്ങള്‍ വരക്കാന്‍ ഹുസൈനെ ചുമതലപ്പെടുത്തിയിരുന്നു. മരണത്തിന് മുമ്പ് 35-ലധികം ചിത്രങ്ങള്‍ പൂര്‍ത്തിയാക്കി. അവയില്‍ ചില ചിത്രങ്ങള്‍ മ്യൂസിയത്തിലുണ്ടാകും. ഹുസൈന് ഒരു ചിത്രത്തില്‍ വരച്ച കെട്ടിടമാണ് മ്യൂസിയത്തിന് മാതൃകയാക്കിയത്. മാനവികതയുടെ പുരോഗതിയെ ആഘോഷിക്കുന്ന ഹുസൈന്റെ അവസാന മാസ്റ്റര്‍പീസ് മ്യൂസിയത്തിന്റെ ഭാഗമാകും.
കലാകാരനെന്ന നിലയില്‍ ഹുസൈന്റെ ശ്രദ്ധേയമായ സാംസ്‌കാരിക യാത്ര വിദ്യാഭ്യാസ നഗരത്തിന് പുത്തന്‍ ഊര്‍ജ്ജം പകരുമെന്ന് ഖത്തര്‍ ഫൗണ്ടേഷന്റെ കമ്മ്യൂണിറ്റി എന്‍ഗേജ്മെന്റ് ആന്‍ഡ് പ്രോഗ്രാമിംഗ് എക്സിക്യൂട്ടീവ് ഡയറക്ടര്‍ ഖോലൂദ് എം. അല്‍-അലി പറഞ്ഞു. എം എഫ് ഹുസൈന് മ്യൂസിയം ഖത്തര്‍ ഫൗണ്ടേഷന്റെ പൊതു കലാശേഖരത്തെ കൂടുതല്‍ സമ്പന്നമാക്കും. വിദ്യാഭ്യാസ നഗരത്തിലുടനീളം 100ലധികം സൃഷ്ടികള്‍ പ്രദര്‍ശിപ്പിക്കുമെന്നും അദ്ദേഹം പറഞ്ഞു.
Related News
