ലണ്ടന്‍-വേഗത്തിന്റെ പര്യായമായി അറിയപ്പെട്ടിരുന്ന ഉസൈന്‍ ബോള്‍ട്ട് ഇപ്പോള്‍ പടികള്‍ കയറാന്‍ പോലും ബുദ്ധിമുട്ടുന്നു എന്ന് വെളിപ്പെടുത്തല്‍. ലോക റെക്കോര്‍ഡുകളുടെ ഉടമയായ ഈ ഇതിഹാസ താരം, പടികള്‍ കയറുമ്പോള്‍ ശ്വാസം കിട്ടാതെ വലയുന്നു എന്നാണ് ബ്രിട്ടീഷ് ദിനപത്രമായ 'ദി ഗാര്‍ഡിയന്' നല്‍കിയ അഭിമുഖത്തില്‍ പറഞ്ഞത്.

ഒരു ദശാബ്ദത്തോളം ലോക അത്ലറ്റിക്‌സില്‍ മനുഷ്യന്റെ വേഗ പരിധികള്‍ തിരുത്തിക്കുറച്ച ജമൈക്കന്‍ സ്പ്രിന്ററായ ബോള്‍ട്ട്, വിരമിച്ചതിന് ശേഷം തന്റെ ജീവിതശൈലിയില്‍ വന്ന വലിയ മാറ്റങ്ങളെക്കുറിച്ചു സംസാരിച്ചു. നിലവില്‍ വീട്ടില്‍ വിശ്രമിക്കുകയും, ഷോകള്‍ കാണുകയും, കുട്ടികളോടൊപ്പം ലെഗോ സെറ്റുകള്‍ നിര്‍മ്മിക്കുകയുമാണ് തന്റെ പ്രധാന വിനോദങ്ങള്‍ എന്നു അദ്ദേഹം പറഞ്ഞു.

ഇത് അമ്പരപ്പിക്കുന്ന ഒരു മാറ്റമാണ്, കാരണം ഒരു ദശാബ്ദത്തിലേറെയായി ബോള്‍ട്ടിന്റെ റെക്കോര്‍ഡുകള്‍ ഭേദിക്കാന്‍ ആര്‍ക്കും കഴിഞ്ഞിട്ടില്ല. 100 മീറ്ററില്‍ (9.58 സെക്കന്‍ഡ്), 200 മീറ്ററില്‍ (19.19 സെക്കന്‍ഡ്), 4ഃ100 മീറ്റര്‍ റിലേയില്‍ (36.84 സെക്കന്‍ഡ്) ഒക്കെ ലോക റെക്കോര്‍ഡുകള്‍ ഇപ്പോഴും അദ്ദേഹത്തിന്റെ പേരിലാണ്. ഈ നേട്ടങ്ങളാണ് അദ്ദേഹത്തെ എക്കാലത്തെയും മികച്ച കായികതാരങ്ങളില്‍ ഒരാളാക്കി മാറ്റിയത്.

2008നും 2016നും ഇടയില്‍ എട്ട് ഒളിമ്പിക് സ്വര്‍ണ മെഡലുകളും 11 ലോക കിരീടങ്ങളും ബോള്‍ട്ട് നേടിയിട്ടുണ്ട്. അദ്ദേഹത്തിന്റെ ഓട്ടമത്സരങ്ങള്‍ ലോകമെമ്പാടുമുള്ള കായിക പ്രേമികള്‍ക്ക് ആവേശകരമായിരുന്നു. മത്സരശേഷം അദ്ദേഹം ലോകത്തിന് നേരെ വിരല്‍ ചൂണ്ടുന്ന 'ടു ഡ വേള്‍ഡ്' പോസും, ടൈസണ്‍ ഗേ, യോഹാന്‍ ബ്ലെയ്ക്ക്, അസഫ പവല്‍, ജസ്റ്റിന്‍ ഗാറ്റ്‌ലിന്‍ തുടങ്ങിയ മികച്ച താരങ്ങളെ തോല്‍പ്പിച്ച് നേടിയ ആധിപത്യവും അദ്ദേഹത്തെ ലോകത്തിലെ ഏറ്റവും ശ്രദ്ധേയനായ കായികതാരമാക്കി മാറ്റി.

എന്നാല്‍, ട്രാക്കിന് പുറത്ത് തന്റെ ഫിറ്റ്‌നസ് വളരെയധികം കുറഞ്ഞുവെന്ന് ബോള്‍ട്ട് സമ്മതിക്കുന്നു. കഴിഞ്ഞ വര്‍ഷം സംഭവിച്ച അക്കില്ലസ് മസിലിന് ഉണ്ടായ പരിക്ക് കാരണം ഓട്ടം പൂര്‍ണ്ണമായും നിര്‍ത്തി. ഇടയ്ക്ക് ജിമ്മില്‍ പോകാന്‍ ശ്രമിക്കാറുണ്ടെങ്കിലും അതില്‍ സ്ഥിരത പുലര്‍ത്താന്‍ സാധിക്കുന്നില്ല എന്നും അദ്ദേഹം വ്യക്തമാക്കി. 'പടികള്‍ കയറുമ്പോള്‍ ശ്വാസം കിട്ടാതെയാകുന്നു,' അദ്ദേഹം പറഞ്ഞു. പഴയ കരുത്ത് വീണ്ടെടുക്കാന്‍ വീണ്ടും ഓടാന്‍ തുടങ്ങേണ്ടി വരുമെന്നും അദ്ദേഹം കൂട്ടിച്ചേര്‍ത്തു. അനായാസമായി ഓടി ലോകത്തെ വിസ്മയിപ്പിച്ച ഒരു മനുഷ്യന്‍ വാര്‍ദ്ധക്യത്തിലും വിരമിക്കലിലും സാധാരണ ജീവിതത്തിന്റെ യാഥാര്‍ത്ഥ്യങ്ങളിലേക്ക് മടങ്ങിവരുന്നത് കാണുമ്പോള്‍ ആരാധകര്‍ക്ക് വിഷമമുണ്ട്.

അഭിമുഖത്തില്‍ പരാമര്‍ശിച്ചില്ലെങ്കിലും, അക്കില്ലസ് മസിലിന് ഉണ്ടായ പരിക്കിന് പുറമേ സ്‌കോളിയോസിസ് എന്ന രോഗാവസ്ഥയും ബോള്‍ട്ടിനെ അലട്ടുന്നുണ്ട്. നട്ടെല്ലിന് ഒരു വശത്തേക്ക് അസാധാരണമായി വളവുണ്ടാകുന്ന അവസ്ഥയാണിത്. ഈ അവസ്ഥ അദ്ദേഹത്തിന്റെ കരിയറിന് തന്നെ ഭീഷണിയായിരുന്നു. എന്നാല്‍ സ്ഥിരമായ ചികിത്സകളും വ്യായാമങ്ങളും വഴി ബോള്‍ട്ട് ഇതിനെ നിയന്ത്രിക്കാന്‍ പഠിച്ചു. 2011-ല്‍ ഇ.എസ്.പി.എന് നല്‍കിയ അഭിമുഖത്തില്‍, കരിയറിന്റെ തുടക്കത്തില്‍ ഈ അവസ്ഥ കാരണം തനിക്ക് പലപ്പോഴും പരിക്കുകള്‍ പറ്റിയിരുന്നതായി ബോള്‍ട്ട് പറഞ്ഞിരുന്നു. 'ഞാന്‍ ചെറുപ്പമായിരുന്നപ്പോള്‍ അതൊരു പ്രശ്നമായിരുന്നില്ല, പക്ഷെ പ്രായം കൂടുമ്പോള്‍ അത് കൂടുതല്‍ വഷളാകുന്നു,' അദ്ദേഹം കൂട്ടിച്ചേര്‍ത്തു.

ഇന്നത്തെ കായികരംഗത്തെക്കുറിച്ചും ബോള്‍ട്ട് അഭിപ്രായപ്പെട്ടു. 2017-ല്‍ വിരമിച്ചതിന് ശേഷം അദ്ദേഹം മത്സരങ്ങള്‍ കാണുന്നത് കുറവായിരുന്നു. എന്നാല്‍ മെലിസ്സ ജെഫേഴ്‌സണ്‍-വുഡന്‍, ഒബ്ലിക് സെവില്‍ തുടങ്ങിയവരുടെ വിജയങ്ങള്‍ അദ്ദേഹത്തിന്റെ താല്‍പര്യം വീണ്ടും വര്‍ദ്ധിപ്പിച്ചു. ഇന്നത്തെ പുരുഷ സ്പ്രിന്റര്‍മാര്‍ക്ക് തന്റെ തലമുറയിലെ വേഗം കൈവരിക്കാന്‍ കഴിയാത്തത് എന്തുകൊണ്ടാണെന്ന് ചോദിച്ചപ്പോള്‍, 'ഞങ്ങള്‍ക്ക് കൂടുതല്‍ കഴിവുണ്ടായിരുന്നു' എന്നായിരുന്നു അദ്ദേഹത്തിന്റെ മറുപടി. ട്രാക്ക് ടെക്‌നോളജികളും 'സൂപ്പര്‍ സ്‌പൈക്കുകളും' മെച്ചപ്പെട്ടുവെങ്കിലും പുരുഷന്മാരുടെ പ്രകടനത്തില്‍ കാര്യമായ പുരോഗതി ഉണ്ടായിട്ടില്ലെന്ന് അദ്ദേഹം ചൂണ്ടിക്കാട്ടി.

ഇന്ന് താരതമ്യേന ശാന്തമായ ഒരു ജീവിതം നയിക്കുമ്പോഴും, ബോള്‍ട്ട് തന്റെ കരിയറിലെ നേട്ടങ്ങളില്‍ അഭിമാനം കൊള്ളുന്നു. 2027-ല്‍ ബീജിംഗില്‍ നടക്കുന്ന ലോക ചാമ്പ്യന്‍ഷിപ്പിലേക്ക് തന്റെ മക്കളായ ഒളിമ്പിയ ലൈറ്റ്‌നിംഗ്, സെയ്ന്റ് ലിയോ, തണ്ടര്‍ എന്നിവരെ കൊണ്ടുപോകാന്‍ പദ്ധതിയിടുന്നതിനെക്കുറിച്ചും അദ്ദേഹം അഭിമാനത്തോടെ സംസാരിച്ചു. 2008-ലെ ഒളിമ്പിക്‌സില്‍ ലോകത്തെ അമ്പരപ്പിച്ച അതേ നഗരത്തില്‍ തന്റെ മക്കളെ കൊണ്ടുപോയി 'ഇവിടെയാണ് ഇതെല്ലാം നടന്നത്' എന്ന് പറയാന്‍ തനിക്ക് സാധിക്കുമെന്ന് അദ്ദേഹം പറഞ്ഞു.

ട്രാക്കില്‍ മിന്നല്‍ വേഗത്തില്‍ കുതിച്ചുപാഞ്ഞ ഉസൈന്‍ ബോള്‍ട്ട് പടികള്‍ കയറുമ്പോള്‍ കിതയ്ക്കുന്നു എന്ന് പറയുമ്പോള്‍, എത്ര വലിയ താരമായാലും ഒടുവില്‍ സാധാരണ ജീവിതത്തിന്റെ താളങ്ങളിലേക്ക് മടങ്ങിവരുന്നു എന്ന യാഥാര്‍ത്ഥ്യമാണ് ഓര്‍മ്മിപ്പിക്കുന്നത്.