കൊച്ചി: മദ്യപിച്ച് വാഹന പരിശോധന നടത്തി പണം പിടുങ്ങാനെത്തിയ മോട്ടോര്‍ വാഹന വകുപ്പ് ഉദ്യോഗസ്ഥനെ നാട്ടുകാര്‍ പിടികൂടി പോലീസില്‍ ഏല്‍പ്പിച്ചു. കാക്കനാട് വെഹിക്കിള്‍ ഇന്‍സ്‌പെക്ടര്‍ ബിനുവാണ് മദ്യപിച്ച് വാഹനപരിശോധനക്കെത്തിയത്. കഴിഞ്ഞ ദിവസം രാത്രി പത്ത് മണിയോടെയാണ് സംഭവം. വഴിയരികില്‍ മത്സ്യ വില്പന നടത്തിയ ദമ്പതികളോട് 3000 രൂപ അടക്കണമെന്ന് ബിനു ആവശ്യപ്പെടുകയായിരുന്നു. ഇതറിഞ്ഞെത്തിയ നാട്ടുകാര്‍ ഇയാളെ തടഞ്ഞുവെച്ച് തൃക്കാക്കര പൊലീസിനെ വിവരം അറിയിക്കുകയായിരുന്നു. പോലീസെത്തി ബിനുവിനെ കസ്റ്റഡിയിലെടുത്തു.

രൂക്ഷമായാണ് നാട്ടുകാര്‍ ബിനുവിനോട് പ്രതികരിച്ചത്. പോലീസെത്തിയിട്ടും കലി തീരാതെ നാട്ടികാര്‍ 'പാവപ്പെട്ടവരെ ഉപദ്രവിക്കാതെ കക്കാന്‍ പൊയ്ക്കൂടെ' എന്നൊക്കെ ചോദിക്കുന്നുണ്ടായിരുന്നു. ബ്രെത്ത് അനലൈസര്‍ ഉപയോഗിച്ച് എംവിഡി ഉദ്യോഗസ്ഥനെ ഊതിക്കുന്നതും തുടര്‍ന്ന് ഇയാളോട് പൊലീസ് ജീപ്പില്‍ കയറാന്‍ ആവശ്യപ്പെടുന്നതും വീഡിയോയില്‍ കാണാം. നാട്ടുകാര്‍ തന്നെ ഇയാളുടെ പുറത്ത് തള്ളി ജീപ്പിനുള്ളിലാക്കാന്‍ ശ്രമിക്കുന്നതും പൊലീസുകാര്‍ അത് തടയുന്നതും വീഡിയോയിലുണ്ട്.