ജിദ്ദ: നവോദയ ജൂബിലി ആഘോഷങ്ങളുടെ ഭാഗമായി ജിദ്ദ നവോദയ ഖാലിദ് ബിന്‍ വലീദ് ഏരിയ കമ്മിറ്റി സംഘടിപ്പിച്ച 'നവോദയോത്സവ് 2025' തിരുവോണ രാവില്‍ അല്‍ലയാലി ഓഡിറ്റോറിയത്തിലെ തിങ്ങിനിറഞ്ഞ ജനസഞ്ചയത്തിന്റെ മനസ്സിന് കുളിരേകി. പ്രശസ്ത ഗസല്‍ ഗായകന്‍ റാസയുടെയും സംഘത്തിന്റെയും ലൈവ് ഗസല്‍ കൊടും ചൂടില്‍ കുളിര്‍മഴയായി പെയ്തിറങ്ങിയത് ആസ്വാദക ഹൃദയങ്ങളില്‍ ആനന്ദം പകര്‍ന്നു. നേരം പുലരുവോളം പ്രണയത്തിന്റെയും വിരഹത്തിന്റെയും നൊമ്പരങ്ങളുടെയും കല്‍പടവുകളിലൂടെ റാസ ആസ്വാദകരെ കൈപിടിച്ചു കൊണ്ടുപോയി. ഇതോടൊപ്പം കല്ലു & മാത്തു സ്‌പെഷ്യല്‍ കുക്കിംഗ് കോണ്ടെസ്റ്റും വന്‍ ജനപങ്കാളിത്തം കൊണ്ട് ശ്രദ്ധേയമായി.
തിരുവോണനാളില്‍ ജിദ്ദ പ്രവാസി സമൂഹം നവോദയക്കൊപ്പം ആഘോഷത്തിനിറങ്ങിയപ്പോള്‍ നവോദയോത്സവ് 2025 ചരിത്ര സംഭവമായി മാറി. ജനബാഹുല്യം കൊണ്ട് ഒരു ഉത്സവ പ്രതീതിയായിരുന്നു അല്‍ലയാലി ഓഡിറ്റോറിയത്തില്‍. നവോദയ ജനറല്‍ സെക്രട്ടറി ശ്രീകുമാര്‍ മാവേലിക്കര ഉദ്ഘാടനം ചെയ്തു. സ്വാഗതസംഗം ചെയര്‍മാന്‍ അാസ് ബാവ, നവോദയ മുഖ്യ രക്ഷാധികാരി ഷിബു തിരുവനന്തപുരം, പ്രസിഡന്റ് കിസ്മത് മമ്പാട്, ട്രഷറര്‍ സി.എം അബ്ദുറഹ്‌മാന്‍, കേന്ദ്ര വനിതാ വേദി കണ്‍വീനര്‍ അനുപമ ബിജുരാജ്, ഏരിയ ട്രഷറര്‍ ഗ്രീവര്‍ ചെമ്മനം, വനിതാ വേദി കണ്‍വീനര്‍ നീനു വിവേക് എന്നിവര്‍ ആശംസകള്‍ നേര്‍ന്നു. പ്രോഗ്രാം കമ്മിറ്റി കണ്‍വീനര്‍ ജിജോ അങ്കമാലി അധ്യക്ഷത വഹിച്ചു. സ്വാഗത സംഘം കണ്‍വീനര്‍ മുനീര്‍ പാണ്ടിക്കാട് സ്വാഗതവും കേന്ദ്ര കമ്മിറ്റി അംഗം യുസഫ് മേലാറ്റൂര്‍ നന്ദിയും പറഞ്ഞു.
ആറ് ടീമുകളാണ് പാചക മത്സരത്തില്‍ പങ്കെടുത്തത്. മത്സരത്തോടൊപ്പം കയറ്റിയ കല്ലു & മാത്തു എന്റര്‍ടൈന്‍മെന്റ് കൂടിയായപ്പോള്‍ ആഘോഷം കെടുമുടി കയറി. വ്യത്യസ്ത സ്വഭാവമുള്ള മൂന്ന് പരിപാടികള്‍ നന്നായി സംവിധാനിച്ചപ്പോള്‍ 2025-ലെ ജിദ്ദയിലെ ഓണാഘോഷം ജിദ്ദ മലയാളി സമൂഹത്തിന് എന്നും ഓര്‍മിക്കാവുന്ന നിമിഷങ്ങള്‍ സമ്മാനിച്ചു.
