ദിസ്പൂര്‍: കരുത്തരായ പഞ്ചാബിനെ തകര്‍ത്തെറിഞ്ഞ് കേരളം സന്തോഷ് ട്രോഫി ഫുട്‌ബോളിന്റെ ഫൈനലില്‍. ദിസ്പൂരില്‍ നടന്ന ആവേശകരമായ സെമി ഫൈനലില്‍ എതിരില്ലാത്ത നാല് ഗോളുകള്‍ക്കായിരുന്നു കേരളത്തിന്റെ ആധികാരിക വിജയം. കേരളത്തിനായി റിയാസ് പി.ടി ഇരട്ട ഗോളുകള്‍ നേടിയപ്പോള്‍ അജ്സല്‍, വിഘ്‌നേഷ് എന്നിവര്‍ ഓരോ ഗോള്‍ വീതം സ്വന്തമാക്കി. കേരളത്തിന്റെ പതിനാറാം ഫൈനല്‍ പ്രവേശനമാണിത്.
മത്സരത്തിന്റെ തുടക്കം മുതല്‍ ആക്രമിച്ചു കളിച്ച കേരളം ആദ്യ പകുതിയില്‍ തന്നെ മൂന്ന് ഗോളുകള്‍ക്ക് മുന്നിലെത്തിയിരുന്നു. അര്‍ജുന്‍ എടുത്ത കൃത്യതയാര്‍ന്ന കോര്‍ണറിന് തലവെച്ച് അജ്സല്‍ കേരളത്തിന്റെ ഗോള്‍ അക്കൗണ്ട് തുറന്നു. വൈകാതെ ബിബിന്‍ അജയന്‍ നല്‍കിയ പാസ് സ്വീകരിച്ച് റിയാസ് പി.ടി ലീഡ് രണ്ടാക്കി ഉയര്‍ത്തി. ഇടവേളയ്ക്ക് തൊട്ടുമുമ്പ് വിഘ്‌നേഷ് കൂടി ലക്ഷ്യം കണ്ടതോടെ കേരളം വിജയമുറപ്പിച്ചു.
രണ്ടാം പകുതിയില്‍ ഗോള്‍ മടക്കാന്‍ പഞ്ചാബ് കിണഞ്ഞു ശ്രമിച്ചെങ്കിലും കേരളത്തിന്റെ പ്രതിരോധം കുലുങ്ങിയില്ല. മത്സരത്തിന്റെ അവസാന പതിനഞ്ച് മിനിറ്റിലേക്ക് കടക്കവെ പഞ്ചാബ് താരം ചുവപ്പ് കാര്‍ഡ് കണ്ട് പുറത്തായത് അവര്‍ക്ക് തിരിച്ചടിയായി. പത്ത് പേരുമായി ചുരുങ്ങിയ പഞ്ചാബിനെതിരെ സജീഷിന്റെ പാസില്‍ നിന്നും റിയാസ് തന്റെ രണ്ടാം ഗോള്‍ നേടി പട്ടിക പൂര്‍ത്തിയാക്കി.
കലാശപ്പോരാട്ടത്തില്‍ കരുത്തരായ സര്‍വീസസാണ് കേരളത്തിന്റെ എതിരാളികള്‍. ഗ്രൂപ്പ് ഘട്ടത്തില്‍ സര്‍വീസസിനോട് വഴങ്ങിയ ഏക ഗോള്‍ തോല്‍വിക്ക് ഫൈനലില്‍ മറുപടി നല്‍കി കിരീടം തിരിച്ചുപിടിക്കാനുറച്ചാകും കേരളം കളത്തിലിറങ്ങുക.
Related News
