ന്യൂഡല്‍ഹി: സാധാരണക്കാരുടെ യാത്രാ ആശ്രയമായ ഇന്ത്യന്‍ റെയില്‍വേയില്‍ ടിക്കറ്റ് നിരക്ക് വര്‍ധന പ്രാബല്യത്തില്‍ വന്നു. ഇന്ന് പുലര്‍ച്ചെ 12 മണി മുതല്‍ യാത്രക്കാര്‍ പുതിയ നിരക്ക് നല്‍കിത്തുടങ്ങി. ആറുമാസത്തിനിടെ ഇത് രണ്ടാം തവണയാണ് റെയില്‍വേ യാത്രക്കാര്‍ക്ക് മേല്‍ അധികബാധ്യത അടിച്ചേല്‍പ്പിക്കുന്നത്.
പുതിയ പരിഷ്‌കാരം അനുസരിച്ച് 215 കിലോമീറ്ററില്‍ കൂടുതല്‍ ദൂരമുള്ള യാത്രകള്‍ക്കാണ് ടിക്കറ്റ് നിരക്ക് കൂടുക. യാത്രക്കാരുടെ പോക്കറ്റ് ചോര്‍ത്തുന്ന വര്‍ധനവ് ഇങ്ങനെയാണ്: പാസഞ്ചര്‍ ട്രെയിനുകള്‍ക്ക് കിലോമീറ്ററിന് ഒരു പൈസയാണ് വര്‍ധിച്ചത്. മെയില്‍/എക്‌സ്പ്രസ് (നോണ്‍ എ.സി): കിലോമീറ്ററിന് രണ്ട് പൈസയും എല്ലാ എ.സി കോച്ചുകളിലും കിലോമീറ്ററിന് രണ്ട് പൈസ വീതവും വര്‍ധനവ് നിലവില്‍ വന്നു. നോണ്‍ എ.സി കോച്ചില്‍ 500 കിലോമീറ്റര്‍ യാത്ര ചെയ്യുന്ന ഒരാള്‍ ഇനി മുതല്‍ ടിക്കറ്റ് തുകയേക്കാള്‍ 10 രൂപ അധികമായി നല്‍കേണ്ടി വരും.
ദൈനംദിന യാത്രക്കാരെ പരിഗണിച്ച് സബര്‍ബന്‍ ട്രെയിനുകളിലും സീസണ്‍ ടിക്കറ്റുകളിലും റെയില്‍വേ മാറ്റം വരുത്തിയിട്ടില്ല. ഇത് ഹ്രസ്വദൂര യാത്രക്കാര്‍ക്കും ജോലിക്കാര്‍ക്കും വലിയ ആശ്വാസമാണ്. ട്രെയിനുകളുടെ നടത്തിപ്പ് ചെലവ് കുത്തനെ വര്‍ധിച്ചതാണ് നിരക്ക് കൂട്ടാന്‍ പ്രേരിപ്പിച്ചതെന്നാണ് റെയില്‍വേ മന്ത്രാലയത്തിന്റെ വിശദീകരണം. ഈ നിരക്ക് വര്‍ധനയിലൂടെ നടപ്പു സാമ്പത്തിക വര്‍ഷം 600 കോടി രൂപ അധിക വരുമാനമാണ് റെയില്‍വേ ലക്ഷ്യമിടുന്നത്.
കഴിഞ്ഞ ജൂലൈ മാസത്തിലായിരുന്നു ഇതിന് മുമ്പ് നിരക്ക് വര്‍ധിപ്പിച്ചത്. അന്ന് ജനറല്‍ ടിക്കറ്റില്‍ ഒരു പൈസയും എ.സി കോച്ചുകളില്‍ രണ്ട് പൈസയുമാണ് കൂട്ടിയത്. പാര്‍ലമെന്റിന്റെ ബജറ്റ് സമ്മേളനം ആരംഭിക്കാന്‍ ദിവസങ്ങള്‍ മാത്രം ബാക്കിനില്‍ക്കെയാണ് റെയില്‍വേ ഈ അപ്രതീക്ഷിത വര്‍ധനവ് നടപ്പിലാക്കിയത് എന്നത് ശ്രദ്ധേയമാണ്.
Related News
