ജിദ്ദ- ജിദ്ദയിലെ ക്രിക്കറ്റ് പ്രേമികളെ ആവേശത്തിലാഴ്ത്തി കെ.പി.എല്‍ സീസണ്‍ 9-ല്‍ വയനാട് പാന്തേഴ്‌സിന് ത്രസിപ്പിക്കുന്ന ജയം. ആറു റണ്‍സിനാണ് വയനാട് പാന്തേഴ്‌സ് തൃശൂര്‍ കൊടിമരത്തെ തോല്‍പ്പിച്ചത്. ആദ്യം ബാറ്റ് ചെയ്ത് ഏഴു വിക്കറ്റ് നഷ്ടത്തില്‍ 156 റണ്‍സ് നേടിയ വയനാട് പാന്തേഴ്‌സിനെ പിന്തുടര്‍ന്നെത്തിയ തൃശൂര്‍ കൊടിമരത്തിന് ആറു വിക്കറ്റ് നഷ്ടത്തില്‍ 150 റണ്‍സ് നേടാനേ കഴിഞ്ഞുള്ളൂ. വയനാടിന്റെ അഷ്‌റഫ് 18 പന്തില്‍ ഏഴ് സിക്‌സറിന്റെയും രണ്ടു ഫോറുകളുടെയും അകമ്പടിയോടെ 51 റണ്‍സ് നേടി. നിഷാദ് 21 പന്തില്‍ 47 റണ്‍സും നേടി. ഇരുവരുടെയും ബാറ്റിംഗ് കരുത്താണ് വയനാടിന് തുണയായത്. തൃശൂരിന്റെ അല്‍ അമീന്‍ ഫൈസല്‍ 31 പന്തില്‍ 59 റണ്‍സ് നേടി ടീമിന് കരുത്തേകി. വയനാടിന്റെ നിഷാദാണ് കളിയിലെ കേമന്‍. ടൂര്‍ണമെന്റിലെ മികച്ച ബാറ്റ്‌സ്മാനായി തൃശൂര്‍ കൊടിമരത്തിന്റെ ഹാരിസിനെ തെരഞ്ഞെടുത്തു. മികച്ച ബോളര്‍ ജെ ഐ സിസി ട്രാവങ്കൂറിന്റെ അന്‍വറിനെയും ,പ്ലേയര്‍ ഓഫ് ദി ടൂര്‍ണമെന്റ് ആയി ഐ സിസി ട്രാവങ്കൂറിന്റെ ഫായിസും നേടി.

വിജയികള്‍ക്ക് കേരള എന്‍ജിനിയേഴ്‌സ് ഫോറം ഫൗണ്ടര്‍ ഇഖ്ബാല്‍ പൊക്കുന്ന് ട്രോഫി വിതരണം ചെയ്തു. അരിസോണ്‍ ഗ്രൂപ്പ് ജനറല്‍ മാനേജര്‍ അബ്ദുല്‍ നാഫി, ഫൈറൂസ് ട്രാവല്‍സ് ചെയര്‍മാന്‍ ഫിറോസ്, തലശേരി വെല്‍ഫെയര്‍ അസോസിയേഷന്റെ ഷറഫു, അമാസി മാനേജിംഗ് ഡയറക്ടര്‍ ഷഫീഖ് താറി, കോഴിക്കോടന്‍ റസ്റ്റോറന്റ് എം.ഡി ഹാരിസ് തുണിച്ചേരി തുടങ്ങിയവര്‍ സമാപന ചടങ്ങില്‍ പങ്കെടുത്തു. അജ്മല്‍ അജു കമന്റേറ്ററായിരുന്നു. ഷാനവാസ് സ്‌നേഹക്കൂട്, ഹസന്‍ എന്നിവര്‍ മത്സരം നിയന്ത്രിച്ചു. ഷമീര്‍ ഷാജഹാന്‍ സ്‌കോറിഗ് നടത്തി.