പട്ന: ബിഹാര്‍ നിയമസഭാ തിരഞ്ഞെടുപ്പില്‍ നേരിട്ട കനത്ത തിരിച്ചടിയെ തുടര്‍ന്ന് കോണ്‍ഗ്രസിനുള്ളില്‍ ആഭ്യന്തര കലഹം രൂക്ഷമാകുന്നു. തിരഞ്ഞെടുപ്പില്‍ പാര്‍ട്ടി വിരുദ്ധ പ്രവര്‍ത്തനം നടത്തിയെന്നും അച്ചടക്ക ലംഘനം നടത്തിയെന്നും ആരോപിച്ച് ഏഴ് നേതാക്കളെ ആറ് വര്‍ഷത്തേക്ക് പാര്‍ട്ടിയില്‍നിന്ന് പുറത്താക്കി. ബിഹാര്‍ പ്രദേശ് കോണ്‍ഗ്രസ് കമ്മിറ്റി (ബി.പി.സി.സി) അച്ചടക്ക സമിതി ചെയര്‍മാന്‍ കപില്‍ദേവ് പ്രസാദ് യാദവാണ് പുറത്താക്കല്‍ ഉത്തരവ് പുറത്തിറക്കിയത്.
എന്നാല്‍ ഈ നടപടി പുതിയ വിവാദങ്ങള്‍ക്ക് തിരികൊളുത്തിയിരിക്കുകയാണ്. തിരഞ്ഞെടുപ്പ് തോല്‍വിക്ക് ഉന്നത നേതാക്കള്‍ക്ക് ഉത്തരവാദിത്തമില്ലാതാക്കാന്‍ 'ബലിയാടുകളെ' കണ്ടെത്താനുള്ള തന്ത്രമാണ് ഇതെന്നാണ് വിമത വിഭാഗം ആരോപിക്കുന്നത്.
ബിഹാറില്‍ അടുത്തിടെ നടന്ന നിയമസഭാ തിരഞ്ഞെടുപ്പില്‍ മഹാസഖ്യം (ആര്‍.ജെ.ഡി., കോണ്‍ഗ്രസ്, സി.പി.ഐ.(എം.എല്‍.)(എല്‍), സി.പി.ഐ.(എം) എന്നിവരടങ്ങിയ സഖ്യം) ആകെ 34 സീറ്റുകളാണ് നേടിയത്. ഇതില്‍ കോണ്‍ഗ്രസിന് ആറ് സീറ്റുകള്‍ മാത്രമാണ് നേടാനായത്. 89 സീറ്റുകള്‍ നേടിയ ബി.ജെ.പി.യും 85 സീറ്റുകള്‍ നേടിയ ജെ.ഡി.യു.വും ഉള്‍പ്പെട്ട എന്‍.ഡി.എ. സഖ്യമാണ് ഇവിടെ സര്‍ക്കാര്‍ രൂപീകരിച്ചത്.
പുറത്താക്കിയ ഏഴ് കോണ്‍ഗ്രസ് നേതാക്കള്‍ ഇവരാണ്:
ആദിത്യ പാസ്വാന്‍ - മുന്‍ വൈസ് പ്രസിഡന്റ്, കോണ്‍ഗ്രസ് സേവാദള്‍
ഷക്കീലുര്‍ റഹ്‌മാന്‍ - മുന്‍ വൈസ് പ്രസിഡന്റ്, ബി.പി.സി.സി.
രാജ് കുമാര്‍ ശര്‍മ്മ - മുന്‍ പ്രസിഡന്റ്, കിസാന്‍ കോണ്‍ഗ്രസ്
രാജ് കുമാര്‍ രാജന്‍ - മുന്‍ പ്രസിഡന്റ്, സംസ്ഥാന യൂത്ത് കോണ്‍ഗ്രസ്
കുന്ദന്‍ ഗുപ്ത - മുന്‍ പ്രസിഡന്റ്, അത്യന്തം പിന്നോക്ക വിഭാഗം
കാഞ്ചന കുമാരി - പ്രസിഡന്റ്, ബാങ്കാ ജില്ലാ കോണ്‍ഗ്രസ് കമ്മിറ്റി
രവി ഗോള്‍ഡന്‍ - നളന്ദ ജില്ല
പാര്‍ട്ടി പുറത്തിറക്കിയ പത്രക്കുറിപ്പ് അനുസരിച്ച്, ഏഴ് നേതാക്കള്‍ക്കെതിരെ പ്രധാനമായും താഴെ പറയുന്ന ആരോപണങ്ങളാണ് ഉന്നയിച്ചിരിക്കുന്നത്:
പാര്‍ട്ടിയുടെ അടിസ്ഥാന ആദര്‍ശങ്ങളില്‍ നിന്ന് വ്യതിചലിച്ചു. സംഘടനാപരമായ മര്യാദകള്‍ ലംഘിച്ചു. പാര്‍ട്ടി വേദികള്‍ക്ക് പുറത്ത് തെറ്റിദ്ധാരണ പരത്തുന്ന പ്രസ്താവനകള്‍ നടത്തി. പത്രമാധ്യമങ്ങളിലും സോഷ്യല്‍ മീഡിയയിലും പാര്‍ട്ടി തീരുമാനങ്ങളെ ആവര്‍ത്തിച്ച് വിമര്‍ശിച്ചു. 'ടിക്കറ്റ് കുംഭകോണം' പോലുള്ള അടിസ്ഥാനരഹിതമായ ആരോപണങ്ങള്‍ ഉന്നയിച്ച് പാര്‍ട്ടിയുടെ പ്രതിച്ഛായയ്ക്ക് കോട്ടം വരുത്തി.
തിരഞ്ഞെടുപ്പ് തോല്‍വിയുടെ പശ്ചാത്തലത്തില്‍, ഈ അച്ചടക്ക നടപടി ബിഹാര്‍ കോണ്‍ഗ്രസിനുള്ളിലെ അതൃപ്തിയും ആഭ്യന്തര തര്‍ക്കങ്ങളും കൂടുതല്‍ വഷളാക്കിയേക്കും.
.jpg)
Related News
