റിയാദ്: കഷണ്ടിയില്ലാത്തവര്‍ക്ക് വിശ്വസിക്കാന്‍ പ്രയാസമുള്ള ഒരു വാര്‍ത്തയാണിത്. സൗദി അറേബ്യയിലെ ഹെയര്‍ ട്രാന്‍സ്പ്ലാന്റ് വിപണി 2033ഓടെ 432.56 മില്യണ്‍ ഡോളറായി വളരുമെന്ന് അമേരിക്കന്‍ മാര്‍ക്കറ്റ് റിസര്‍ച്ച് സ്ഥാപനമായ ഈമാര്‍ക്ക് ഗ്രൂപ്പിന്റെ റിപ്പോര്‍ട്ട്. നിലവില്‍ 2024-ലെ വിപണി മൂല്യം 71.56 മില്യണ്‍ ഡോളറാണ്. അതായത്, 22.13% വാര്‍ഷിക വളര്‍ച്ചാ നിരക്കാണ് ഈ മേഖലയില്‍ പ്രതീക്ഷിക്കുന്നത്.

ഈ വന്‍ വളര്‍ച്ചയ്ക്ക് പ്രധാന കാരണം ആര്‍ട്ടിഫിഷ്യല്‍ ഇന്റലിജന്‍സ് (എഐ) സാങ്കേതികവിദ്യയില്‍ പ്രവര്‍ത്തിക്കുന്ന റോബോട്ടിക് സംവിധാനങ്ങള്‍ നല്‍കുന്ന ഉയര്‍ന്ന കൃത്യതയാണെന്ന് റിപ്പോര്‍ട്ട് ചൂണ്ടിക്കാട്ടുന്നു.

റിയാദിലെ പ്രത്യേക ക്ലിനിക്കുകളില്‍ എഐ സഹായത്തോടെ ചെയ്യുന്ന ഹെയര്‍ ട്രാന്‍സ്പ്ലാന്റ് പ്രക്രിയക്ക് 95 ശതമാനംവരെ വിജയം കൈവരിക്കാന്‍ സാധിക്കും. രോഗമുക്തി കാലയളവ് 3 മുതല്‍ 5 ദിവസമായി കുറയും. മറ്റ് രാജ്യങ്ങളെ അപേക്ഷിച്ച് കുറഞ്ഞ ചികിത്സാ ചെലവായതിനാല്‍ ഈ ചികിത്സകള്‍ക്കായി സൗദി അറേബ്യയിലേക്ക് നിരവധി വിദേശ വിനോദസഞ്ചാരികളെ ആകര്‍ഷിക്കും.

ജിദ്ദയിലെ ഹെയര്‍ ട്രാന്‍സ്പ്ലാന്റ് ക്ലിനിക്കുകള്‍, തലയോട്ടി വിശകലനം ചെയ്യാനും ഓരോ വ്യക്തിക്കും അനുയോജ്യമായ ട്രാന്‍സ്പ്ലാന്റ് ഉറപ്പാക്കാനും നിര്‍ണായകമായ ജനിതക വിവരങ്ങള്‍ നല്‍കാനും കഴിയുന്ന നൂതന ഉപകരണങ്ങള്‍ പ്രയോജനപ്പെടുത്തുന്നതായി റിപ്പോര്‍ട്ട് പറയുന്നു.

ഹെയര്‍ ട്രാന്‍സ്പ്ലാന്റ് ക്ലിനിക്കുകളിലെ സാങ്കേതിക നവീകരണം ഉപഭോക്തൃ സംതൃപ്തി 30% വര്‍ദ്ധിപ്പിക്കുമെന്നും ഇത് വിഷന്‍ 2030-ന്റെ ലക്ഷ്യങ്ങള്‍ കൈവരിക്കാന്‍ സഹായിക്കുമെന്നും റിപ്പോര്‍ട്ട് സൂചിപ്പിക്കുന്നു.