അമരാവതി: യുഎസ് വിസ ലഭിക്കാതിരുന്നതിനെത്തുടര്ന്ന് യുവവനിതാ ഡോക്ടര് ആത്മഹത്യ ചെയ്തു. ആന്ധ്രാപ്രദേശിലെ ഗുണ്ടൂര് സ്വദേശിയായ രോഹിണിയാണ് (38) മരിച്ചത്. ഹൈദരാബാദിലെ തന്റെ ഫ്ലാറ്റിലായിരുന്നു യുവതി ആത്മഹത്യ ചെയ്തത്. വാതില് തുറക്കാത്തതിനെത്തുടര്ന്ന് വീട്ടുജോലിക്കാരിയാണ് രോഹിണിയുടെ കുടുംബാംഗങ്ങളെ വിവരം അറിയിച്ചത്. ബന്ധുക്കളെത്തി വാതില് തകര്ത്ത് അകത്ത് കയറിയപ്പോഴാണ് രോഹിണിയെ മരിച്ചനിലയില് കണ്ടത്.
രോഹിണി അമിത അളവില് ഉറക്കഗുളിക കഴിക്കുകയോ സ്വയം മരുന്ന് കുത്തിവയ്ക്കുകയോ ചെയ്തിരിക്കാമെന്നാണ് പൊലീസ് പറയുന്നത്. ഫ്ലാറ്റില് നിന്ന് കണ്ടെത്തിയ ആത്മഹത്യാക്കുറിപ്പില് വിസ നിഷേധിച്ചതിനെ തുടര്ന്ന് താന് വിഷാദത്തിലാണെന്ന് രോഹിണി സൂചിപ്പിച്ചിരുന്നു. ജോലിക്ക് യുഎസിലേക്ക് പോകാന് മകള് വളരെ ആഗ്രഹത്തോടെ കാത്തിരിക്കുകയായിരുന്നുവെന്നും പക്ഷേ വിസ നിരസിച്ചത് അവളെ വിഷാദത്തിലാക്കിയെന്നും രോഹിണിയുടെ അമ്മ ലക്ഷ്മി പറഞ്ഞു.
ഹൈദരാബാദിലെ പദ്മ റാവു നഗറിലായിരുന്നു രോഹിണി താമസിച്ചിരുന്നത്. ഇന്റേണല് മെഡിസിനില് സ്പെഷ്യലൈസ് ചെയ്യാനായിരുന്നു രോഹിണിയുടെ ആഗ്രഹം. സംഭവത്തില് പൊലീസ് കേസെടുത്ത് അന്വേഷണം ആരംഭിച്ചു. പോസ്റ്റ്മോര്ട്ടത്തിന് ശേഷം മൃതദേഹം കുടുംബാംഗങ്ങള്ക്ക് കൈമാറി.
Related News
