ഗിര് സോമനാഥ്: എസ്ഐആര് ഡ്യൂട്ടിയിലെ അമിതമായ മാനസിക സമ്മര്ദ്ദവും കനത്ത ജോലിഭാരവും താങ്ങാനാകാതെ ഗുജറാത്തില് വീണ്ടും അധ്യാപകന് ജീവനൊടുക്കി. ഗിര് സോമനാഥ് ജില്ലയിലെ കൊടിനാര് ദേവ്ലി സ്വദേശിയായ പ്രൈമറി സ്കൂള് അധ്യാപകന് അരവിന്ദ് വധേര് (കൊടിനാറിലെ ഛാറ ഗ്രാമം) ആണ് മരിച്ചത്. രാവിലെ 6:30-ഓടെ വീട്ടില് മരിച്ച നിലയില് കണ്ടെത്തിയ അരവിന്ദ് വധേറിന്റെ ആത്മഹത്യാക്കുറിപ്പ് പോലീസ് കണ്ടെടുത്തു. ജോലിഭാരം താങ്ങാനാവുന്നില്ല എന്ന് കുറിപ്പില് അദ്ദേഹം വ്യക്തമാക്കുന്നു.
അധ്യാപകര്ക്കിടയിലെ വര്ധിച്ചുവരുന്ന ജോലിഭാരത്തെയും സമ്മര്ദ്ദത്തെയും ഈ സംഭവം വീണ്ടും ശ്രദ്ധയില് കൊണ്ടുവരുന്നു. സംഭവത്തില് ഞെട്ടലുണ്ടെന്ന് ഗിര് സോമനാഥ് കളക്ടറും ജില്ലാ തിരഞ്ഞെടുപ്പ് ഓഫീസറുമായ എന്.വി. ഉപാദ്ധ്യായ അറിയിച്ചു. അരവിന്ദ് മികച്ചൊരു ബി.എല്.ഒ (ബൂത്ത് ലെവല് ഓഫീസര്) ആയിരുന്നുവെന്നും, ചുരുങ്ങിയ സമയം കൊണ്ട് 40% ജോലി പൂര്ത്തിയാക്കിയെന്നും അദ്ദേഹം കൂട്ടിച്ചേര്ത്തു. പോലീസ് അന്വേഷണം ആരംഭിച്ചു.
ഇതിനു തൊട്ടുമുമ്പ് വ്യാഴാഴ്ച, ഖേദ ജില്ലയില് ബി.എല്.ഒ ഡ്യൂട്ടി നോക്കിയ മറ്റൊരു അധ്യാപകനായ രമേശ്ഭായി പര്മാര് (50) ഉറക്കത്തിനിടെ ഹൃദയാഘാതം വന്ന് മരണപ്പെട്ടിരുന്നു. അമിതമായ എസ്ഐആര് ഡ്യൂട്ടി അധ്യാപകരുടെ ആരോഗ്യത്തെ ബാധിക്കുന്നതില് ആശങ്ക പ്രകടിപ്പിച്ച അധ്യാപക സംഘടനകള്, ജോലിഭാരം കുറയ്ക്കുന്നതിനുള്ള നടപടികള് സ്വീകരിക്കണമെന്ന് കളക്ടര്മാരോട് ആവശ്യപ്പെട്ടു.
Related News
