പുട്ടപര്‍ത്തി: പ്രധാനമന്ത്രി നരേന്ദ്ര മോദി പങ്കെടുത്ത പടരിപാടിയില്‍ നടി ഐശ്വര്യ റായ് ബച്ചന്‍ നടത്തിയ പ്രസംഗം വൈറലായി. ഐശ്വര്യ റായിയുടെ വാക്കുകള്‍ ഇപ്പോള്‍ സമൂഹമാധ്യമങ്ങളില്‍ തരംഗമാണ്. വിദ്വേഷത്തിന്റെ വിത്തുകള്‍ പാകി വിഭാഗീയമായ ചര്‍ച്ചകള്‍ക്ക് വഴിമാറുന്ന കാലഘട്ടത്തില്‍, സ്‌നേഹത്തെയും മനുഷ്യത്വത്തെയും വാഴ്ത്തുന്ന അവരുടെ പ്രസംഗം ഐക്യത്തിന്റെ സന്ദേശമായി മാറുകയായിരുന്നു.

''ഒരു ജാതി മാത്രമേയുള്ളൂ, അത് മനുഷ്യത്വത്തിന്റെ ജാതിയാണ്. ഒരു മതമേയുള്ളൂ, അത് സ്‌നേഹത്തിന്റെ മതമാണ്. ഒരു ഭാഷയേയുള്ളൂ, അത് ഹൃദയത്തിന്റെ ഭാഷയാണ്. ഒരു ദൈവമേയുള്ളൂ, അദ്ദേഹം സര്‍വവ്യാപിയാണ്.'' ഐശ്വര്യ റായ് ബച്ചന്റെ പ്രസംഗത്തിലെ ഈ വാക്കുകള്‍ രാജ്യം ഏറ്റെടുക്കുകയായിരുന്നു.

ആന്ധ്രാപ്രദേശിലെ പുട്ടപര്‍ത്തിയില്‍ നടന്ന സത്യ സായിബാബയുടെ ജന്മശതാബ്ദി ആഘോഷവേളയിലാണ് ഐശ്വര്യ തന്റെ ശക്തമായ കാഴ്ച്ചപ്പാടുകള്‍ പങ്കുവെച്ചത്. രാജ്യത്തെ ഉന്നത നേതാക്കളിലൊരാളായ പ്രധാനമന്ത്രി നരേന്ദ്ര മോദി വേദിയില്‍ സന്നിഹിതനായിരിക്കെ, ജാതി, മതം, ഭാഷ എന്നിവയെക്കുറിച്ചുള്ള തന്റെ ദര്‍ശനം അവര്‍ തുറന്നു പറഞ്ഞു.

സൗന്ദര്യത്തിന് പുറമെ, ശക്തമായ സാമൂഹിക കാഴ്ചപ്പാടുകള്‍ കൂടി തനിക്കുണ്ടെന്ന് തെളിയിച്ച ഐശ്വര്യ റായ് ബച്ചന്റെ ഈ 'മനുഷ്യത്വ' ഭാഷണം ഇതിനോടകം തന്നെ ലക്ഷക്കണക്കിന് ആളുകളാണ് ഏറ്റെടുത്തിരിക്കുന്നത്.