ന്യൂഡല്‍ഹി: യാത്രാ വിമാനം നിര്‍മിക്കാന്‍ ഇന്ത്യയും റഷ്യയും ധാരണാ പത്രത്തില്‍ ഒപ്പി്ട്ടു. ഇന്ത്യയുടെ ഹിന്ദുസ്ഥാന്‍ എയ്‌റോനോട്ടിക്‌സ് ലിമിറ്റഡ് (എച്ച്എഎല്‍) റഷ്യന്‍ കമ്പനിയായ യുണൈറ്റഡ് എയര്‍ക്രാഫ്റ്റ് കോര്‍പറേഷനുമായി (യുഎസി) സഹകരിച്ചാണ് വിമാനം നിര്‍മിക്കുക. എസ്‌ജെ100 എന്ന വിമാനമാണു ഇന്ത്യയില്‍ നിര്‍മിക്കുക. എച്ച്എഎല്‍ ചെയര്‍മാനും മാനേജിങ് ഡയറക്ടറുമായ ഡി.കെ. സുനിലും പിജെഎസ്സിയുഎസി ഡയറക്ടര്‍ ജനറല്‍ വാഡിം ബഡേഖയുമാണ് ധാരണാപത്രത്തില്‍ ഒപ്പിട്ടത്.

യാത്രാ വിമാനം ഇന്ത്യയില്‍ നിര്‍മിക്കാനുള്ള ആദ്യ പദ്ധതിയാണിത്. ഇതിനോടകം 200 എസ്‌ജെ100 വിമാനങ്ങള്‍ നിര്‍മിച്ചിട്ടുണ്ട്. ലോകത്തിലെ 16 വിമാന കമ്പനികള്‍ ഇവ ഉപയോഗിക്കുന്നുണ്ട്. 40,000 അടി ഉയരത്തില്‍ വരെ പറക്കാന്‍ സാധിക്കുന്ന എസ്‌ജെ 100 വിമാനങ്ങളില്‍ 103 പേര്‍ക്കു യാത്ര ചെയ്യാം. 4000 കിലോമീറ്റര്‍ വരെ പറക്കാം. കൂടുതല്‍ സൗകര്യമുള്ള ബിസിനസ് വകഭേദത്തില്‍ 60 യാത്രക്കാര്‍ക്കു വരെ സഞ്ചരിക്കാം. ഇവയ്ക്ക് 7200 കിലോമീറ്റര്‍ വരെ സഞ്ചരിക്കാന്‍ സാധിക്കും.