ഇസ്ലാമാബാദ് :പാകിസ്താനില് മൂന്നിടങ്ങളിലായി നടന്ന സ്ഫോടനത്തില് 25 പേര് കൊല്ലപ്പെട്ടു.ബലൂചിസ്ഥാന് പ്രവിശ്യയുടെ തലസ്ഥാനമായ ക്വറ്റയില് ബലൂചിസ്താന് നാഷണല് പാര്ട്ടിയുടെ (ബിഎന്പി) രാഷ്ട്രീയ റാലിക്കിടെയുണ്ടായ സ്ഫോടനത്തില് 14 പേര് കൊല്ലപ്പെട്ടു. 35 ലധികം പേര്ക്ക് പരിക്കേറ്റു.ബലൂചിസ്ഥാനില് നടന്ന ആക്രമണത്തില് അഞ്ച് പേര് കൊല്ലപ്പെട്ടു. വടക്കുപടിഞ്ഞാറന് പ്രവിശ്യയായ ഖൈബര് പഖ്തൂണ്ഖ്വയിലെ ബന്നു നഗരത്തിലെ അര്ധസൈനിക ആസ്ഥാനത്ത് നടന്ന സ്ഫോടനത്തില് ആറ് സൈനികര് കൊല്ലപ്പെട്ടു. നടന്നത് ചാവേറാക്രമണമാണെന്നാണ് സൂചന.
ക്വറ്റയില് നൂറുകണക്കിന് അംഗങ്ങള് ഒത്തുകൂടിയ സ്ഥലത്തായിരുന്നു സ്ഫോടനം നടന്നത്. പരിക്കേറ്റവരില് ഏഴ് പേരുടെ നില ഗുരുതരമാണെന്ന് അധികൃതര് പറഞ്ഞു. സര്ദാര് അത്തൗല്ല മെംഗലിന്റെ നാലാം ചരമവാര്ഷികാഘോഷ പരിപാടി അവസാനിച്ചതിന് തൊട്ടുപിന്നാലെയാണ് ഷാഹ്വാനി സ്റ്റേഡിയത്തിന് സമീപം സ്ഫോടനം ഉണ്ടായത്. ബിഎന്പി നേതാവ് അക്തര് മെംഗലിനെയും അദ്ദേഹത്തിന്റെ വാഹനവ്യൂഹത്തെയും ലക്ഷ്യമിട്ടാണ് ആക്രമണം നടന്നതെന്നാണ് പ്രാഥമിക നിഗമനം.
Related News
