ജലാലാബാദ്: അഫ്ഗാനിസ്ഥാന്റെ കിഴക്കന്‍ മേഖലയിലുണ്ടായ ശക്തമായ ഭൂകമ്പത്തില്‍ മരണം 900 കവിഞ്ഞു. 3000-ത്തിലധികം പേര്‍ക്ക് പരിക്കേറ്റതായി അധികൃതര്‍ ചൊവ്വാഴ്ച അറിയിച്ചു. അവശിഷ്ടങ്ങള്‍ക്കിടയില്‍ കുടുങ്ങിക്കിടക്കുന്നവരെ രക്ഷിക്കാനുള്ള ശ്രമങ്ങള്‍ തുടരുകയാണ്.
ഞായറാഴ്ച രാത്രി വൈകിയാണ് 6.0 തീവ്രത രേഖപ്പെടുത്തിയ ഭൂകമ്പം ഉണ്ടായത്. മലയോര മേഖലയിലെ നിരവധി ഗ്രാമങ്ങള്‍ ഭൂകമ്പത്തില്‍ തകര്‍ന്നു. മണിക്കൂറുകളോളം ആളുകള്‍ കെട്ടിടാവശിഷ്ടങ്ങള്‍ക്കിടയില്‍ കുടുങ്ങിക്കിടന്നു.
'പരിക്കേറ്റവരെ ഒഴിപ്പിച്ചു കൊണ്ടിരിക്കുകയാണ്, അതിനാല്‍ മരണസംഖ്യ ഇനിയും ഉയരാന്‍ സാധ്യതയുണ്ട്,' അഫ്ഗാനിസ്ഥാന്‍ ദേശീയ ദുരന്ത നിവാരണ അതോറിറ്റി വക്താവ് യൂസഫ് ഹമ്മാദ് അസോസിയേറ്റഡ് പ്രസ്സിനോട് പറഞ്ഞു. 'ചില സ്ഥലങ്ങളില്‍ മണ്ണിടിച്ചിലുണ്ടായി റോഡുകള്‍ തടസ്സപ്പെട്ടിരുന്നു. എന്നാല്‍, തടസ്സങ്ങള്‍ നീക്കി റോഡുകള്‍ ഗതാഗതയോഗ്യമാക്കിയിട്ടുണ്ട്, രക്ഷാപ്രവര്‍ത്തകര്‍ക്ക് എത്തിപ്പെടാന്‍ ബുദ്ധിമുട്ടുള്ള സ്ഥലങ്ങളിലേക്ക് വഴിതുറക്കാന്‍ ബാക്കിയുള്ള റോഡുകള്‍ കൂടി തുറക്കും,' അദ്ദേഹം കൂട്ടിച്ചേര്‍ത്തു.
.jpg)
