റിയാദ്: ആഗോള വ്യോമയാന മേഖലയില്‍ വിപ്ലവകരമായ മാറ്റങ്ങള്‍ ലക്ഷ്യമിടുന്ന സൗദി അറേബ്യയുടെ പുതിയ ദേശീയ വിമാനക്കമ്പനിയായ 'റിയാദ് എയര്‍', ചരക്ക് ഗതാഗത വിപണിയിലേക്ക് ഔദ്യോഗികമായി പ്രവേശിച്ചു. 'റിയാദ് കാര്‍ഗോ' എന്ന പേരിലുള്ള പുതിയ ബ്രാന്‍ഡ് കമ്പനി പുറത്തിറക്കി. ലോകത്തെ പ്രധാന വിപണികളിലേക്ക് അതിവേഗത്തിലും സുരക്ഷിതമായും ചരക്കുകള്‍ എത്തിക്കുക എന്ന ലക്ഷ്യത്തോടെയാണിത്.

പുതിയ സര്‍വീസുകള്‍ക്കായി 120-ലധികം വൈഡ് ബോഡി വിമാനങ്ങളാണ് റിയാദ് എയര്‍ ഇതിനകം ഓര്‍ഡര്‍ ചെയ്തിരിക്കുന്നത്. ഈ വിമാനങ്ങളിലെ 'ബെല്ലി-ഹോള്‍ഡ്' (Belly-hold) സംവിധാനം പ്രയോജനപ്പെടുത്തി ചരക്ക് നീക്കം സജീവമാക്കാനാണ് കമ്പനിയുടെ തീരുമാനം. റിയാദ് ആസ്ഥാനമായി പ്രവര്‍ത്തിക്കുന്ന ഈ വിഭാഗം, സൗദി അറേബ്യയെ ഒരു ആഗോള ലോജിസ്റ്റിക് ഹബ്ബാക്കി മാറ്റുക എന്ന ലക്ഷ്യത്തിലേക്കുള്ള നിര്‍ണ്ണായക ചുവടുവെപ്പാണ്.

റിയാദ് എയറിന്റെ 'റോഡ് ടു ടേക്ക് ഓഫ്' തന്ത്രത്തിന്റെ ഭാഗമായി റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തില്‍ നിന്ന് ലണ്ടന്‍ ഹീത്രൂവിലേക്ക് നടത്തിയ പരീക്ഷണ പറക്കലുകള്‍ വന്‍ വിജയമായിരുന്നു. ഈ റൂട്ടില്‍ വന്‍തോതില്‍ വസ്ത്രങ്ങള്‍, ഫ്രഷ് പൂക്കള്‍, മത്സ്യം, ചായ, കാപ്പി എന്നിവ റിയാദ് കാര്‍ഗോ വിജയകരമായി എത്തിച്ചു. നശിച്ചുപോകാന്‍ സാധ്യതയുള്ളതും അതിവേഗം എത്തിക്കേണ്ടതുമായ ഉല്‍പ്പന്നങ്ങള്‍ കൈകാര്യം ചെയ്യുന്നതിലുള്ള കമ്പനിയുടെ മികവ് ഇതിലൂടെ തെളിയിക്കപ്പെട്ടു.

ആധുനിക സാങ്കേതികവിദ്യയുടെ സഹായത്തോടെയാണ് റിയാദ് കാര്‍ഗോ പ്രവര്‍ത്തിക്കുന്നത്. കാര്‍ഗോ പ്രവര്‍ത്തനങ്ങള്‍ നിയന്ത്രിക്കാന്‍ ആധുനിക 'കാര്‍ഗോസ്പോട്ട് നിയോ' (CargoSpot Neo) സിസ്റ്റം ഏര്‍പ്പെടുത്തിയിട്ടുണ്ട്. ചരക്കുകളുടെ തത്സമയ നീക്കം നിരീക്ഷിക്കാന്‍ ഡിജിറ്റല്‍ ട്രാക്കിംഗ് സംവിധാനമുള്ള ഉപകരണങ്ങള്‍ ചരക്ക് നീക്കം കൂടുതല്‍ സുതാര്യമാക്കാനും കൃത്യസമയത്ത് തീരുമാനങ്ങള്‍ എടുക്കാനും സഹായിക്കുമെന്ന് റിയാദ് എയര്‍ കാര്‍ഗോ ആഗോള മേധാവി പ്രവീണ്‍ സിംഗ് പറഞ്ഞു.

സൗദിയിലെ മൂന്ന് പ്രധാന വിമാനത്താവളങ്ങളായ റിയാദ്, ജിദ്ദ, ദമ്മാം എന്നിവിടങ്ങളില്‍ SATS Saudi Arabiaയുമായി സഹകരിച്ചാണ് ഗ്രൗണ്ട് ഹാന്‍ഡ്ലിംഗ് സേവനങ്ങള്‍ ഒരുക്കിയിരിക്കുന്നത്. ആധുനിക സൗകര്യങ്ങളോടു കൂടിയ പ്രത്യേക ഹാന്‍ഡ്ലിംഗ് ഏരിയകള്‍ ഇവിടെ സജ്ജമാണ്.

2030-ഓടെ നൂറിലധികം ലക്ഷ്യസ്ഥാനങ്ങളിലേക്ക് സര്‍വീസ് നടത്താനാണ് റിയാദ് എയര്‍ ലക്ഷ്യമിടുന്നത്. ഇതിലൂടെ സൗദി അറേബ്യയുടെ എണ്ണയിതര വരുമാനത്തിലേക്ക് ഏകദേശം 20 ബില്യണ്‍ ഡോളര്‍ സംഭാവന ചെയ്യാനും ആഗോളതലത്തില്‍ 2 ലക്ഷത്തിലധികം തൊഴിലവസരങ്ങള്‍ സൃഷ്ടിക്കാനും കമ്പനിക്ക് സാധിക്കുമെന്ന് പ്രതീക്ഷിക്കുന്നു.

യാത്രക്കായി ലോകത്തിലെ ഏറ്റവും ആധുനികമായ വിമാനങ്ങളാണ് റിയാദ് എയര്‍ സ്വന്തമാക്കുന്നത്. നിലവില്‍ 180-ലധികം വിമാനങ്ങള്‍ക്ക് കമ്പനി ഓര്‍ഡര്‍ നല്‍കിക്കഴിഞ്ഞു. ഇതില്‍ Boeing 787 Dreamliner, Airbus A321neo, Airbus A350-1000 എന്നിവ ഉള്‍പ്പെടുന്നു. 2030-ഓടെ ലോകത്തെ 100-ലധികം ലക്ഷ്യസ്ഥാനങ്ങളിലേക്ക് പറക്കുക എന്നതാണ് ലക്ഷ്യം.