റിയാദ്: രാജ്യത്തെ പൊതുഗതാഗത സംവിധാനം അത്യാധുനികവല്ക്കരിക്കുന്നതിന്റെ ഭാഗമായി സൗദി അറേബ്യ റെയില്വേ (SAR) 10 പുതിയ പാസഞ്ചര് ട്രെയിനുകള്ക്കായി ടെന്ഡര് ക്ഷണിച്ചു. നോര്ത്തേണ് റെയില്വേ നെറ്റ്വര്ക്കിലെ യാത്രാസൗകര്യങ്ങള് വര്ദ്ധിപ്പിക്കാനും വര്ദ്ധിച്ചുവരുന്ന യാത്രക്കാരുടെ എണ്ണം കണക്കിലെടുത്തുമാണ് ഈ സുപ്രധാന നീക്കം. സൗദി വിഷന് 2030-ന്റെയും നാഷണല് ട്രാന്സ്പോര്ട്ട് ആന്ഡ് ലോജിസ്റ്റിക്സ് സ്ട്രാറ്റജിയുടെയും ലക്ഷ്യങ്ങള് മുന്നിര്ത്തിയാണ് പദ്ധതിയെന്ന് അധികൃതര് അറിയിച്ചു.
പുതിയ ട്രെയിനുകള് എത്തുന്നതോടെ നോര്ത്തേണ് നെറ്റ്വര്ക്കിന്റെ പ്രവര്ത്തനക്ഷമത ഏകദേശം മൂന്നിരട്ടിയായി വര്ദ്ധിക്കുമെന്ന് സൗദി റെയില്വേ സി.ഇ.ഒ ബാഷര് അല്-മാലിക് പറഞ്ഞു. ഇതോടെ പ്രതിവര്ഷം 24 ലക്ഷത്തിലധികം സീറ്റുകള് യാത്രക്കാര്ക്കായി ലഭ്യമാകും. പ്രധാന നഗരങ്ങള് തമ്മിലുള്ള യാത്രാബന്ധം ശക്തമാക്കുന്നതില് പുതിയ ട്രെയിനുകള് നിര്ണ്ണായക പങ്ക് വഹിക്കും.
നിലവില് റിയാദ്, അല്-മജ്മഅ, ഖസീം, ഹായില്, അല്-ജൗഫ്, അല്-ഖുറയ്യാത്ത് എന്നീ പ്രധാന നഗരങ്ങളെയാണ് നോര്ത്തേണ് നെറ്റ്വര്ക്ക് ബന്ധിപ്പിക്കുന്നത്. വരും ഘട്ടങ്ങളില് അല്-സുല്ഫി ഉള്പ്പെടെയുള്ള പുതിയ സ്റ്റേഷനുകള് കൂടി ഈ ശൃംഖലയുടെ ഭാഗമാകും.
നോര്ത്തേണ് നെറ്റ്വര്ക്കിന് പുറമെ ഈസ്റ്റേണ് ലൈനിനായും 10 പുതിയ ട്രെയിനുകള് നിലവില് നിര്മ്മാണത്തിലാണ്. യാത്രാ സേവനങ്ങളുടെ ഗുണനിലവാരം ഉയര്ത്തുന്നതിനൊപ്പം സമയനിഷ്ഠയും വിശ്വാസ്യതയും ഉറപ്പാക്കി രാജ്യത്തെ ഏറ്റവും മികച്ച യാത്രാമാര്ഗ്ഗമായി റെയില്വേയെ മാറ്റാനാണ് സര്ക്കാര് ലക്ഷ്യമിടുന്നത്. ട്രെയിനുകളുടെ എണ്ണം വര്ദ്ധിക്കുന്നതോടെ കൂടുതല് സര്വീസുകള് ലഭ്യമാകുന്നത് പ്രവാസികള് ഉള്പ്പെടെയുള്ള യാത്രക്കാര്ക്ക് വലിയ ആശ്വാസമാകും.
Related News
