സ്റ്റോക്ക്ഹോം: 2025-ലെ സാഹിത്യത്തിനുള്ള നൊബേല്‍ സമ്മാനം ഹംഗേറിയന്‍ എഴുത്തുകാരനായ ലാസ്ലോ ക്രസ്‌നഹോര്‍ക്കൈക്ക്. മനുഷ്യ മനസ്സിന്റെ ഇരുണ്ടതും വിഷാദപൂര്‍ണ്ണവുമായ ലോകങ്ങളെ വരച്ചുകാട്ടുന്ന അദ്ദേഹത്തിന്റെ കൃതികളെ മാനിച്ചാണ് പുരസ്‌കാരം. സാഹിത്യത്തിലെ ആധുനികതയുടെ വക്താക്കളില്‍ പ്രമുഖനാണ് ക്രസ്‌നഹോര്‍ക്കൈ.

1954-ല്‍ ഹംഗറിയില്‍ ജനിച്ച ലാസ്ലോ ക്രസ്‌നഹോര്‍ക്കൈയുടെ കൃതികള്‍, സിനിമകളിലെ ദൃശ്യങ്ങള്‍പോലെ നീണ്ടുനീണ്ടുപോകുന്ന വാചകങ്ങളും സങ്കീര്‍ണ്ണമായ ആഖ്യാനഘടനയുംകൊണ്ട് ശ്രദ്ധേയമാണ്.


'സാത്താന്‍ ടാംഗോ' (Satantango): ഈ നോവലിനാണ് 2015-ല്‍ അദ്ദേഹത്തിന് മാന്‍ ബുക്കര്‍ സമ്മാനം ലഭിച്ചത്. 'ദ വേള്‍ഡ് ഗോസ് ഓണ്‍' (The World Goes On): 2018-ലെ ബുക്കര്‍ പുരസ്‌കാരത്തിനുള്ള അന്തിമപട്ടികയില്‍ ഈ കൃതി ഇടംനേടി. 'ടൂറിന്‍ കുതിര' (The Turin Horse), 'വടക്ക് ഒരു പര്‍വതം, തെക്ക് ഒരു തടാകം, പടിഞ്ഞാറ് പാതകള്‍, കിഴക്ക് ഒരു നദി' (A Mountain to the North, a Lake to the South, Paths to the West, a River to the East) എന്നിവയാണ് പ്രധാന കൃതികള്‍. 1985-ലാണ് അദ്ദേഹം തന്റെ ആദ്യ നോവല്‍ രചിക്കുന്നത്. മനുഷ്യന്റെ നിസ്സഹായതയും നിലനില്‍പ്പിനായുള്ള പോരാട്ടവും അദ്ദേഹത്തിന്റെ രചനകളിലെ പ്രധാന വിഷയങ്ങളാണ്.