കൊച്ചി: ഭൂട്ടാന് വഴി ആഡംബര കാറുകള് അനധികൃതമായി കടത്തിയെന്ന കേസിന്റെ ഭാഗമായി, പ്രമുഖ നടന്മാരായ മമ്മൂട്ടിയുടെയും ദുല്ഖര് സല്മാന്റെയും പൃഥ്വി രാജിന്റെയും വീടുകളില് എന്ഫോഴ്സ്മെന്റ് ഡയറക്ടറേറ്റ് (ഇ.ഡി.) പരിശോധന. കള്ളപ്പണം വെളുപ്പിക്കല് (Money Laundering) നടന്നിട്ടുണ്ടോ എന്ന് അന്വേഷിക്കുന്നതിന്റെ ഭാഗമായാണ് ഇ.ഡി.യുടെ നടപടി.
കൊച്ചിയിലെ മമ്മൂട്ടിയുടെയും ദുല്ഖര് സല്മാന്റെയും വസതികള്ക്കു പുറമെ സംസ്ഥാനത്തൊട്ടാകെ 17 ഇടങ്ങളിലാണ് ഒരേസമയം റെയ്ഡ് നടന്നത്. മറ്റൊരു നടന് അമിത് ചക്കാലക്കലിന്റെ വീട്ടിലും അഞ്ചു ജില്ലകളിലായി വാഹന ഡീലര്മാരുടെ വീടുകളിലും സ്ഥാപനങ്ങളിലും പരിശോധന നടക്കുന്നുണ്ട്. നേരത്തെ കസ്റ്റംസ് 'ഓപ്പറേഷന് നുംഖോര്' എന്ന പേരില് നടത്തിയ വ്യാപക പരിശോധനയ്ക്ക് പിന്നാലെയാണ് ഇ.ഡി.യുടെ ഇടപെടല്.
ഭൂട്ടാനില് നിന്നും ഇറക്കുമതി തീരുവ (Customs Duty) വെട്ടിച്ചുകൊണ്ട് ലക്ഷക്കണക്കിന് രൂപയുടെ ആഡംബര കാറുകള് രാജ്യത്തേക്ക് കടത്തിയെന്നാണ് കേസ്. ഈ വാഹനങ്ങള്ക്ക് വ്യാജരേഖകള് ചമച്ച് ഇന്ത്യയില് രജിസ്ട്രേഷന് നേടിയതായി കസ്റ്റംസ് കണ്ടെത്തിയിരുന്നു. കേസിന്റെ ആദ്യഘട്ടത്തില് ദുല്ഖര് സല്മാന് വാങ്ങിയ രണ്ട് ആഡംബര കാറുകള് കസ്റ്റംസ് പിടിച്ചെടുത്തിരുന്നു. ഇതില് ഒരു ലാന്ഡ് റോവര് ഡിഫന്ഡര് വിട്ടുകിട്ടണമെന്ന് ആവശ്യപ്പെട്ട് നടന് ഹൈക്കോടതിയെ സമീപിച്ചിട്ടുണ്ട്.
ഭൂട്ടാന് കാര് കടത്തുമായി ബന്ധപ്പെട്ട് സിനിമാ മേഖലയിലെ കൂടുതല് പേര്ക്ക് പങ്കുണ്ടോ എന്നതിനെക്കുറിച്ച് അന്വേഷണം നടക്കുന്നുണ്ട്. മുന്പ് നടന് പൃഥ്വിരാജ് സുകുമാരന്റെയും അമിത് ചക്കാലക്കലിന്റെയും വീടുകളില് കസ്റ്റംസ് പരിശോധന നടത്തിയിരുന്നു. ഇടനിലക്കാര് തട്ടിപ്പിലൂടെ സംഘടിപ്പിച്ച വാഹനങ്ങള്, സിനിമാ താരങ്ങള് അടക്കമുള്ള സമ്പന്നരായ വ്യക്തികള്ക്ക് ഉയര്ന്ന വിലയ്ക്ക് മറിച്ചുവിറ്റെന്നാണ് അന്വേഷണ ഏജന്സികളുടെ നിഗമനം. ഈ സാമ്പത്തിക ഇടപാടുകളുടെ രേഖകളും ഉറവിടവുമാണ് ഇ.ഡി. ഇപ്പോള് പരിശോധിച്ചുവരുന്നത്. കേസില് കൂടുതല് പേരെ ചോദ്യം ചെയ്യാനായി വിളിപ്പിക്കാന് സാധ്യതയുണ്ട്.
Related News
