ലണ്ടന്‍: വിസ കാലാവധി കഴിഞ്ഞും വിദേശ വിദ്യാര്‍ഥികള്‍ രാജ്യത്തു തുടരുന്നതിനും അഭയം തേടുന്നതിനുമെതിരെ ബ്രിട്ടന്റെ മുന്നറിയിപ്പ്. ഇതുമായി ബന്ധപ്പെട്ട സന്ദേശം ഇന്ത്യയില്‍നിന്നടക്കമുള്ള വിദ്യാര്‍ഥികള്‍ക്ക് നേരിട്ട് അയച്ചു തുടങ്ങിയതായി ആഭ്യന്തര മന്ത്രി ഇവെറ്റ് കൂപ്പര്‍ പാര്‍ലമെന്റില്‍ അറിയിച്ചു.

വിദ്യാര്‍ഥികള്‍ വിസ ദുരുപയോഗം ചെയ്യുന്നതടക്കമുള്ള പ്രശ്‌നങ്ങള്‍ ചൂണ്ടിക്കാട്ടി ഈ വര്‍ഷം ആദ്യം ധവളപത്രം ഇറക്കിയിരുന്നു. കുഴഞ്ഞുമറിഞ്ഞ അവസ്ഥയ്ക്കു പരിഹാരം കാണാനുള്ള പ്രായോഗിക നടപടികളാണു സ്വീകരിച്ചു വരുന്നതെന്ന് മന്ത്രി വ്യക്തമാക്കി.

മാതൃരാജ്യത്തേക്കു തിരിച്ചുപോകാന്‍ തടസ്സങ്ങളില്ലാത്തവര്‍ പോലും വിസ തീരാറാകുമ്പോള്‍ ബ്രിട്ടനില്‍ത്തന്നെ അഭയം തേടുന്ന പ്രവണതയാണുള്ളതെന്നും ഓരോ വര്‍ഷവും 15,000 വിദ്യാര്‍ഥികള്‍ ഇത്തരത്തില്‍ അപേക്ഷിക്കാറുണ്ടെന്നും മന്ത്രി വെളിപ്പെടുത്തി. ശക്തമായ നടപടികളിലൂടെ ഇതു നിയന്ത്രിക്കാനുള്ള ശ്രമത്തിലാണ് ബ്രിട്ടണ്‍. മുന്‍കാലങ്ങളില്‍ പലരീതിയിലുളള ഇളവരുകള്‍ തേടിയായിരുന്നു കാലാവധി കഴിഞ്ഞും പലരും പിടിച്ചു നിന്നിരുന്നത്.

2022-23 അക്കാദമിക് വര്‍ഷത്തില്‍ ഹയര്‍ എജുക്കേഷന്‍ സ്റ്റാറ്റിസ്റ്റിക്‌സ് ഏജന്‍സിയുടെ കണക്കു പ്രകാരം ബ്രിട്ടനിലെ ഉയര്‍ന്ന വിദ്യാഭ്യാസ സ്ഥാപനങ്ങളില്‍ 173,000 ഇന്ത്യന്‍ വിദ്യാര്‍ഥികള്‍ പഠിച്ചിരുന്നു. ഇത് മുന്‍വര്‍ഷങ്ങളുമായി താരതമ്യം ചെയ്താല്‍ ആറ് മടങ്ങ് വര്‍ദ്ധനവാണ്. 2023-24 വര്‍ഷത്തില്‍ വിവിധ രാജ്യങ്ങളില്‍നിന്ന് ബ്രിട്ടനില്‍ പഠിക്കാനെത്തിയത്. 732,285 വിദ്യാര്‍ഥികളാണെന്നാണ്. അതില്‍ മുന്നില്‍ ഇന്ത്യ (22.7%) ആയിരുന്നു. ഇക്കാലയളവില്‍ ഇന്ത്യയില്‍ നിന്നുള്ള വിദ്യാര്‍ത്ഥി എണ്ണം ഏകദേശം 166,310 ആയി കണക്കാക്കപ്പെടുന്നു. ഈ വര്‍ഷം അതില്‍ കുറവുണ്ടായിട്ടുണ്ടെന്നാണ് കണക്കുകള്‍ സൂചിപ്പിക്കുന്നത്.