വാഷിങ്ടന്‍: ഇന്ത്യയും പാക്കിസ്ഥാനും തമ്മില്‍ വെടിനിര്‍ത്തല്‍ കരാര്‍ ഉണ്ടാക്കിയതിനു പിന്നില്‍ താനാണെന്ന് ആവര്‍ത്തിച്ച് യുഎസ് പ്രസിഡന്റ് ഡോണള്‍ഡ് ട്രംപ്. ഏഴു വിമാനങ്ങള്‍ വെടിവച്ചിട്ടെന്നും അദ്ദേഹം അവകാശപ്പെട്ടു. എന്നാല്‍ ഏതു രാജ്യം, ഏതൊക്കെ വിമാനങ്ങള്‍ വെടിവച്ചിട്ടുവെന്നതില്‍ വ്യക്തതയില്ല. അഞ്ച് വിമാനങ്ങള്‍ വെടിവച്ചിട്ടെന്നാണ് ട്രംപ് നേരത്തെ അവകാശപ്പെട്ടിരുന്നത്.

ഇന്ത്യയും പാക്കിസ്ഥാനും തമ്മില്‍ വെടിനിര്‍ത്തല്‍ കരാര്‍ യാഥാര്‍ഥ്യമായതിനു പിന്നില്‍ യുഎസുമായുള്ള വ്യാപാരമാണെന്നും ട്രംപ് ആവര്‍ത്തിച്ചു. ''24 മണിക്കൂറിനുള്ളില്‍ വെടിനിര്‍ത്തല്‍ നടപ്പിലായില്ലെങ്കില്‍ വ്യാപാരം നിര്‍ത്തിവയ്ക്കുമെന്ന് യുഎസ് ഭീഷണിപ്പെടുത്തി. നിങ്ങള്‍ക്ക് വ്യാപരമല്ലേ വേണ്ടത്. യുദ്ധം ചെയ്തുകൊണ്ടിരുന്നാല്‍ നിങ്ങളുമായി ഒരു വ്യാപാരവും ഞങ്ങള്‍ നടത്തില്ല. 24 മണിക്കൂറിനുള്ളില്‍ തീരുമാനം എടുക്കണമെന്നു പറഞ്ഞു, അവരത് എടുത്തു. ഞാനിത് പലവട്ടം പ്രയോഗിച്ചിട്ടുണ്ട്. പരിഹാരം കാണാന്‍ വ്യാപാരമോ മറ്റെന്തെങ്കിലുമോ ആണ് വേണ്ടതെങ്കില്‍ ഞാനത് ഉപയോഗിച്ചിട്ടുണ്ട്.'' ട്രംപ് ആവര്‍ത്തിച്ചു. ട്രംപ് ഇതിനു മുന്‍പും ഇതേ വാദം ഉന്നയിച്ചിരുന്നുവെങ്കിലും ഇന്ത്യ അതു തള്ളുകയായിരുന്നു. അമേരിക്ക ഏര്‍പ്പെടുത്തിയ അധിക നികുചി പ്രാബല്യത്തിലാവാന്‍ മണിക്കൂറുകള്‍ അവശേഷിക്കെയാണ് ട്രംപ് തന്റെ വാദവുമായി വീണ്ടും രംഗപ്രവേശം ചെയ്തിട്ടുള്ളത്.