റിയാദ്: സൗദി അറേബ്യയുടെ പുതിയ പ്രീമിയം വിമാനക്കമ്പനിയായ റിയാദ് എയര്‍ ഇന്ത്യയിലേക്കുള്ള സര്‍വീസുകള്‍ക്ക് ഔദ്യോഗികമായി തുടക്കമിട്ടു. കമ്പനിയുടെ ഇന്ത്യയിലെ ആദ്യ വിമാനം സൗദി തലസ്ഥാനമായ റിയാദില്‍ നിന്ന് മുംബൈയിലെത്തി. റിയാദ് എയറിന്റെ വിമാനങ്ങള്‍ സര്‍വീസ് നടത്തുന്ന ലോകത്തെ ഒമ്പതാമത്തെ രാജ്യമാണ് ഇന്ത്യ.

രാജ്യത്തിന്റെ വാണിജ്യ തലസ്ഥാനമായ മുംബൈയിലേക്കുള്ള ഈ പ്രവേശനം തങ്ങളുടെ പ്രവര്‍ത്തനങ്ങളില്‍ വലിയൊരു നാഴികക്കല്ലും പുതിയൊരു തുടക്കവുമാണെന്ന് കമ്പനി അറിയിച്ചു. ഏറ്റവും അത്യാധുനിക സൗകര്യങ്ങളുള്ള ബോയിങ് 787-9 ഡ്രീംലൈനര്‍ വിമാനത്തിലാണ് ആദ്യ യാത്ര നടന്നത്. റിയാദില്‍ നിന്ന് പുറപ്പെട്ട വിമാനം ഇന്ത്യന്‍ സമയം രാത്രി എട്ടരയോടെയാണ് മുംബൈയിലെത്തിയത്. ആദ്യ വാണിജ്യ പറക്കലിന്റെ ഉദ്ഘാടന ചടങ്ങില്‍ ഇന്ത്യന്‍ എംബസി പ്രതിനിധികളും സംബന്ധിച്ചു.

ഇനി മുതല്‍ ആഴ്ചയില്‍ ഏഴ് ദിവസവും, അതായത് ദിവസേന മുംബൈയിലേക്ക് റിയാദ് എയറിന്റെ സര്‍വീസുകളുണ്ടാകും. റിയാദില്‍ നിന്ന് ഉച്ചയ്ക്ക് 2:05-ന് പുറപ്പെടുന്ന വിമാനം ഇന്ത്യന്‍ സമയം രാത്രി 8:35-നാണ് മുംബൈയില്‍ ലാന്‍ഡ് ചെയ്യുന്നത്. മടക്ക സര്‍വീസില്‍, മുംബൈയില്‍ നിന്ന് രാത്രി 10:05-ന് പുറപ്പെടുന്ന വിമാനം സൗദി പ്രാദേശിക സമയം രാത്രി 11:50-ഓടെ റിയാദില്‍ തിരിച്ചെത്തും. ഏകദേശം നാല് മണിക്കൂറാണ് യാത്രാ സമയം.

ഇന്ത്യയിലേക്കുള്ള ആദ്യ യാത്ര വിജയകരമായി പൂര്‍ത്തിയാക്കിയ വിവരം റിയാദ് എയര്‍ തങ്ങളുടെ ഔദ്യോഗിക എക്സ് അക്കൗണ്ടിലൂടെ പങ്കുവെച്ചിട്ടുണ്ട്. സൗദിക്കും ഇന്ത്യയ്ക്കുമിടയില്‍ യാത്ര ചെയ്യുന്ന സാധാരണക്കാര്‍ക്കും പ്രവാസികള്‍ക്കും വ്യാപാരികള്‍ക്കും ഒരുപോലെ വലിയ ആശ്വാസമാകുന്നതാണ് ഈ പുതിയ വിമാന സര്‍വീസ്.

ഏഷ്യന്‍ റൂട്ടുകള്‍ വിപുലീകരിച്ച് റിയാദ് എയര്‍; മനിലയിലേക്കും പ്രതിദിന സര്‍വീസുകള്‍ വരുന്നു

ഇന്ത്യന്‍ സര്‍വീസുകള്‍ക്ക് പുറമെ ഏഷ്യയുമായുള്ള വ്യോമ ബന്ധം കൂടുതല്‍ ശക്തിപ്പെടുത്തുന്നതിന്റെ ഭാഗമായി ഫിലിപ്പീന്‍സിലേക്കും പുതിയ സര്‍വീസുകള്‍ പ്രഖ്യാപിച്ചിട്ടുണ്ട്. അടുത്ത മാസം മുതല്‍ റിയാദിനും മനിലയ്ക്കും ഇടയില്‍ പ്രതിദിന സര്‍വീസുകള്‍ ആരംഭിക്കും.

കഴിഞ്ഞ ജൂണില്‍ ലണ്ടനിലേക്കുള്ള ആദ്യ വാണിജ്യ വിമാന സര്‍വീസിന് ശേഷം, 2030-ഓടെ സൗദി അറേബ്യയെ ലോകമെമ്പാടുമുള്ള 100-ലധികം അന്താരാഷ്ട്ര ലക്ഷ്യസ്ഥാനങ്ങളുമായി ബന്ധിപ്പിക്കുക എന്ന ലക്ഷ്യത്തോടെ നിരവധി പുതിയ റൂട്ടുകളാണ് റിയാദ് എയര്‍ അതിവേഗം ആരംഭിച്ചുകൊണ്ടിരിക്കുന്നത്. ഈ വര്‍ഷം ജൂലൈ അവസാനത്തോടെ മലേഷ്യയിലേക്ക് ആഴ്ചയില്‍ മൂന്ന് സര്‍വീസുകള്‍ ആരംഭിച്ചുകൊണ്ട് എയര്‍ലൈന്‍ തന്റെ ആദ്യ തെക്കുകിഴക്കന്‍ ഏഷ്യന്‍ ലക്ഷ്യസ്ഥാനം കുറിച്ചിരുന്നു. സെപ്റ്റംബര്‍ 9-നാണ് മനിലയിലേക്കുള്ള സര്‍വീസുകള്‍ക്ക് തുടക്കമിടുന്നത്.

സൗദി അറേബ്യയില്‍ താമസിക്കുന്ന ഫിലിപ്പിനോ സമൂഹത്തിനും, റിയാദിനും മനിലയ്ക്കുമിടയില്‍ യാത്ര ചെയ്യുന്ന ബിസിനസ്സ് യാത്രികര്‍ക്കും വിനോദസഞ്ചാരികള്‍ക്കും ഇത് മികച്ച യാത്രാനുഭവവും പുതിയൊരു യാത്രാമാര്‍ഗ്ഗവും നല്‍കുമെന്ന് എയര്‍ലൈന്‍ അധികൃതര്‍ വ്യക്തമാക്കി. വിദേശത്ത് ജോലി ചെയ്യുന്ന ഏറ്റവും കൂടുതല്‍ ഫിലിപ്പിനോ തൊഴിലാളികള്‍ ഉള്ള സൗദി അറേബ്യയുമായുള്ള ഉഭയകക്ഷി ബന്ധത്തിന് പുതിയ സര്‍വീസുകള്‍ കൂടുതല്‍ കരുത്തേകും.