മിന: സൗദി ഭരണാധികാരി സല്മാന് രാജാവിന്റെയും കിരീടാവകാശി മുഹമ്മദ് ബിന് സല്മാന് രാജകുമാരന്റെയും പ്രത്യേക അതിഥികളായി ഹജ്ജ് കര്മ്മത്തിനെത്തിയ ഇന്ത്യ, കൊസോവോ എന്നിവിടങ്ങളില് നിന്നുള്ള പ്രതിനിധികളുമായി സൗദി ഇസ്ലാമിക കാര്യ മന്ത്രി ഷെയ്ഖ് അബ്ദുല്ലത്തീഫ് അല് അല്ഷെയ്ഖ് മിനയില് കൂടിക്കാഴ്ച നടത്തി.
വിശുദ്ധ നഗരങ്ങളിലെ മികച്ച സൗകര്യങ്ങള്ക്കും കൃത്യമായ ഹജ്ജ് സംഘാടനത്തിനും അതിഥികള് സല്മാന് രാജാവിനും കിരീടാവകാശിക്കും നന്ദി അറിയിച്ചു. ജനക്കൂട്ടത്തെ നിയന്ത്രിക്കുന്നതിലും തീര്ഥാടകര്ക്ക് ആവശ്യമായ സേവനങ്ങള് ലഭ്യമാക്കുന്നതിലും സൗദി അറേബ്യ ലോകത്തിന് തന്നെ മികച്ച മാതൃകയാണെന്ന് അവര് പ്രശംസിച്ചു. രാജ്യത്ത് എത്തിയത് മുതല് ഹജ്ജ് കര്മ്മങ്ങള് പൂര്ത്തിയാക്കുന്നത് വരെ തങ്ങള്ക്ക് ലഭിച്ച മികച്ച സ്വീകരണത്തെയും പരിചരണത്തെയും അവര് എടുത്തുപറഞ്ഞു.
ഇന്ത്യന് പ്രതിനിധികള്ക്ക് പുറമെ ഇന്തോനേഷ്യ, ഫിലിപ്പീന്സ്, നേപ്പാള്, ഓസ്ട്രേലിയ എന്നീ രാജ്യങ്ങളില് നിന്നുള്ള പ്രമുഖ ഇസ്ലാമിക പണ്ഡിതരുമായും മന്ത്രി കൂടിക്കാഴ്ച നടത്തി. ഇസ്ലാമിനും മുസ്ലിംകള്ക്കും നല്കുന്ന സേവനങ്ങള്ക്കും വിശുദ്ധ മസ്ജിദുകളുടെ സംരക്ഷണത്തിനും സൗദി അറേബ്യ വഹിക്കുന്ന നേതൃത്വപരമായ പങ്കിനെ അവര് അഭിനന്ദിച്ചു. തീര്ഥാടകര്ക്ക് യാതൊരുവിധ ബുദ്ധിമുട്ടുകളുമില്ലാതെ പ്രാര്ത്ഥനകളില് മുഴുകാന് സഹായിക്കുന്ന തരത്തിലുള്ള ബോധവല്ക്കരണ-മാര്ഗ്ഗനിര്ദ്ദേശ പ്രവര്ത്തനങ്ങളെയും അവര് പ്രശംസിച്ചു.
ഇത്തവണ ഈ പ്രത്യേക പ്രോഗ്രാമിന്റെ ഭാഗമായി 104 രാജ്യങ്ങളില് നിന്നായി ആകെ 2,500 തീര്ഥാടകരാണ് സൗദിയിലെത്തിയത്. ഇതില് 1,300 ആഗോള ഇസ്ലാമിക പണ്ഡിതരും പ്രമുഖ വ്യക്തിത്വങ്ങളും ഉള്പ്പെടുന്നു. കൂടാതെ ലൈബീരിയയില് നിന്നുള്ള 200 പേരും, സുഡാനിലെ രക്തസാക്ഷികളുടെയും പരിക്കേറ്റവരുടെയും കുടുംബാംഗങ്ങളായ 1,000 പേരും ഈ സംഘത്തിലുണ്ട്.
തീര്ഥാടകര്ക്ക് സുഗമമായും സമാധാനത്തോടെയും ഹജ്ജ് കര്മ്മങ്ങള് നിര്വഹിക്കാന് ആവശ്യമായ എല്ലാ സൗകര്യങ്ങളും സേവനങ്ങളും ഒരുക്കാന് സൗദി അറേബ്യ എപ്പോഴും പ്രതിജ്ഞാബദ്ധമാണെന്ന് മന്ത്രി അബ്ദുല്ലത്തീഫ് അല് അല്ഷെയ്ഖ് വ്യക്തമാക്കി.
Related News
