ദുബായ്/ഫ്ലോറിഡ: പശ്ചിമേഷ്യന് യുദ്ധം രണ്ട് മാസം പിന്നിടുമ്പോള് തന്ത്രപ്രധാനമായ ഹോര്മുസ് കടലിടുക്കില് സംഘര്ഷം മൂര്ച്ഛിക്കുന്നു. അമേരിക്കന് യുദ്ധക്കപ്പലിനെ ഇറാന്റെ നാവികസേന തുരത്തിയോടിച്ചതായും മിസൈല് ആക്രമണം നടത്തിയതായും റിപ്പോര്ട്ടുകള് പുറത്തുവന്നെങ്കിലും, യുഎസ് സെന്ട്രല് കമാന്ഡ് ഇത് നിഷേധിച്ചു. തങ്ങളുടെ കപ്പലുകള്ക്ക് നേരെ ആക്രമണമൊന്നും ഉണ്ടായിട്ടില്ലെന്നും ഇറാന് മേലുള്ള നാവിക ഉപരോധം തുടരുകയാണെന്നും യുഎസ് വ്യക്തമാക്കി.
കടലിടുക്കില് കുടുങ്ങിക്കിടക്കുന്ന വാണിജ്യ കപ്പലുകളെയും ജീവനക്കാരെയും സുരക്ഷിതമായി പുറത്തെത്തിക്കുന്നതിനായി 'പ്രോജക്ട് ഫ്രീഡം' എന്ന പേരില് പുതിയ ദൗത്യം ആരംഭിക്കുമെന്ന് യുഎസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ചു. ഉപരോധം മൂലം മാസങ്ങളായി കടലില് കഴിയുന്ന കപ്പലുകളില് ഭക്ഷണവും അവശ്യസാധനങ്ങളും തീരുന്ന സാഹചര്യത്തിലാണ് ഈ 'മാനുഷിക' ഇടപെടലെന്ന് ട്രംപ് ട്രൂത്ത് സോഷ്യലിലൂടെ വ്യക്തമാക്കി.
ഗൈഡഡ് മിസൈല് ഡിസ്ട്രോയറുകള്, നൂറിലധികം വിമാനങ്ങള്, ഡ്രോണുകള്, 15,000 സൈനികര് എന്നിവരടങ്ങുന്ന വന് സന്നാഹമാണ് ഈ ദൗത്യത്തിനായി യുഎസ് ഒരുക്കിയിരിക്കുന്നത്. ഏകദേശം 900-ഓളം കപ്പലുകള് നിലവില് ഇവിടെ കുടുങ്ങിക്കിടക്കുന്നതായാണ് വിവരം.
അമേരിക്കന് നീക്കത്തിനെതിരെ ഇറാന് ശക്തമായ മുന്നറിയിപ്പ് നല്കി. ഹോര്മുസ് കടലിടുക്കിലൂടെയുള്ള ഏത് സഞ്ചാരവും തങ്ങളുടെ സൈന്യവുമായി ഏകോപിപ്പിക്കണമെന്നും ഭീഷണിയുടെ ഭാഷ ഇറാനോട് വേണ്ടെന്നും വിദേശകാര്യ മന്ത്രാലയ വക്താവ് ഇസ്മായില് ബഖാഇ പറഞ്ഞു.
ഹോര്മുസ് കടലിടുക്കിലേക്ക് പ്രവേശിക്കാന് ശ്രമിച്ച യുഎസ് കപ്പലിന് നേരെ തങ്ങള് മുന്നറിയിപ്പ് വെടിവെപ്പ് നടത്തിയതായി ഇറാന് ഉദ്യോഗസ്ഥര് റോയിട്ടേഴ്സിനോട് പറഞ്ഞു. യുഎസ് ഫ്രിഗേറ്റിന് നേരെ രണ്ട് മിസൈലുകള് തൊടുത്തുവിട്ടതായി ഇറാനിയന് മാധ്യമങ്ങള് റിപ്പോര്ട്ട് ചെയ്തെങ്കിലും നാശനഷ്ടങ്ങള് വ്യക്തമല്ല.
യുദ്ധം അവസാനിപ്പിക്കാനായി ഇറാന് സമര്പ്പിച്ച 14 നിര്ദ്ദേശങ്ങള് അടങ്ങിയ പ്ലാന് പാകിസ്ഥാന് മധ്യസ്ഥര് വഴി അമേരിക്കയ്ക്ക് കൈമാറി. എന്നാല്, ഉപരോധം പിന്വലിക്കണമെന്നും യുഎസ് അമിതമായ ആവശ്യങ്ങള് ഉപേക്ഷിക്കണമെന്നും ഇറാന് ആവശ്യപ്പെട്ടു. ഒരു മാസത്തിനകം ചര്ച്ചകള് പൂര്ത്തിയാക്കി കടലിടുക്ക് തുറന്നുകൊടുക്കണമെന്നാണ് ഇറാന്റെ നിലപാട്. ഏപ്രില് 8-ന് നിലവില് വന്ന വെടിനിര്ത്തലിന് ശേഷം കാര്യമായ പുരോഗതി ചര്ച്ചകളില് ഉണ്ടായിട്ടില്ല.
ഹോര്മുസ് കടലിടുക്കിലെ സുരക്ഷാ ഭീഷണി ഇപ്പോഴും 'ക്രിട്ടിക്കല്' (അതീവ ഗുരുതരം) വിഭാഗത്തിലാണെന്ന് യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷന്സ് മുന്നറിയിപ്പ് നല്കി. ഒമാന്റെ പ്രാദേശിക ജലാതിര്ത്തിയിലൂടെയുള്ള പാത ഉപയോഗിക്കാന് കപ്പലുകള്ക്ക് നിര്ദ്ദേശം നല്കിയിട്ടുണ്ട്.
Related News
