തിരുവനന്തപുരം: സംസ്ഥാന നിയമസഭാ തെരഞ്ഞെടുപ്പിന്റെ പോളിങ് കണക്കുകള്‍ കേന്ദ്ര തെരഞ്ഞെടുപ്പ് കമ്മീഷന്‍ പുറത്തുവിട്ടു. ഇവിഎമ്മും പോസ്റ്റല്‍ വോട്ടുകളും ഉള്‍പ്പെടെ കേരളത്തില്‍ 79.63 ശതമാനം പോളിങ് രേഖപ്പെടുത്തിയതായി മുഖ്യ തെരഞ്ഞെടുപ്പ് ഓഫീസര്‍ യു. രത്തന്‍ ഖേല്‍ക്കര്‍ അറിയിച്ചു. സര്‍വീസ് വോട്ടുകള്‍ കൂടി പൂര്‍ണ്ണമായി ക്രോഡീകരിക്കുന്നതോടെ മാത്രമേ അന്തിമ കണക്കുകളില്‍ വ്യക്തത വരികയുള്ളൂ.

ബൂത്തുകളില്‍ നേരിട്ടെത്തി വോട്ട് ചെയ്തവരുടെ എണ്ണം കമ്മീഷന്‍ വിശദമായി പുറത്തുവിട്ടു. ആകെ 2,12,43,942 പേരാണ് വോട്ട് ചെയ്തത്. ഇതില്‍ 1,13,03,410 സ്ത്രീകളും 99,40,379 പുരുഷന്മാരും 153 ട്രാന്‍സ്‌ജെന്‍ഡറുകളും ഉള്‍പ്പെടുന്നു. സ്ത്രീകള്‍ തന്നെയാണ് വോട്ടിങ്ങില്‍ മുന്നിട്ടുനില്‍ക്കുന്നത്.

മുതിര്‍ന്ന പൗരന്മാരുടെ പോളിങ് 96.3 ശതമാനവും ഭിന്നശേഷിക്കാരുടേത് 96.7 ശതമാനവുമാണ്. തെരഞ്ഞെടുപ്പ് ഡ്യൂട്ടിയുണ്ടായിരുന്ന 1,35,068 ഉദ്യോഗസ്ഥര്‍ വോട്ട് രേഖപ്പെടുത്തി (96.37%). ആകെ 3,68,193 പോസ്റ്റല്‍ വോട്ടുകളാണ് ഇതുവരെ രേഖപ്പെടുത്തിയിട്ടുള്ളത്. ഇതില്‍ അവശ്യവിഭാഗത്തിലുള്ള 32,172 പേരുടെ വോട്ടുകളും ഉള്‍പ്പെടുന്നു.

നടപടിക്രമങ്ങളില്‍ യാതൊരു കാലതാമസവും ഉണ്ടായിട്ടില്ലെന്നും പൂര്‍ണ്ണമായും സുതാര്യമായ രീതിയിലാണ് കണക്കുകള്‍ ശേഖരിച്ചതെന്നും രത്തന്‍ ഖേല്‍ക്കര്‍ വ്യക്തമാക്കി.