തിരുവനന്തപുരം: ഏപ്രില്‍ 9-ന് നടന്ന കേരള നിയമസഭാ തിരഞ്ഞെടുപ്പിന്റെ മണ്ഡലം തിരിച്ചുള്ള വിശദമായ പോളിംഗ് വിവരങ്ങള്‍ ഉടന്‍ പുറത്തുവിടണമെന്ന് ആവശ്യപ്പെട്ട് പ്രതിപക്ഷ നേതാവ് വി.ഡി. സതീശന്‍ തിരഞ്ഞെടുപ്പ് കമ്മീഷന് കത്തയച്ചു. വോട്ടെടുപ്പ് കഴിഞ്ഞ് മൂന്ന് ദിവസം പിന്നിട്ടിട്ടും ഔദ്യോഗികവും സാക്ഷ്യപ്പെടുത്തിയതുമായ കണക്കുകള്‍ കമ്മീഷന്റെ വെബ്സൈറ്റില്‍ ലഭ്യമാക്കിയിട്ടില്ലെന്ന് അദ്ദേഹം മുഖ്യ തിരഞ്ഞെടുപ്പ് കമ്മീഷണര്‍ക്ക് അയച്ച കത്തില്‍ ചൂണ്ടിക്കാട്ടി.

പോളിംഗ് സംബന്ധിച്ച കൃത്യമായ വിവരങ്ങള്‍ ലഭ്യമാകാത്തത് സുതാര്യതയെ ബാധിക്കുമെന്ന ആശങ്കയും അദ്ദേഹം പങ്കുവെച്ചു. ഓരോ മണ്ഡലത്തിലും രേഖപ്പെടുത്തിയ വോട്ടുകളുടെ കൃത്യമായ കണക്കുകള്‍ എത്രയും വേഗം പ്രസിദ്ധീകരിച്ച് ജനങ്ങള്‍ക്കിടയിലുള്ള അവ്യക്തത നീക്കണമെന്നും സതീശന്‍ ആവശ്യപ്പെട്ടു. നിലവില്‍ ലഭ്യമായ പ്രാഥമിക കണക്കുകളില്‍ നിന്ന് വ്യത്യസ്തമായി സ്ഥിരീകരിക്കപ്പെട്ട അന്തിമ വിവരങ്ങള്‍ക്കായി രാഷ്ട്രീയ പാര്‍ട്ടികളും വോട്ടര്‍മാരും കാത്തിരിക്കുകയാണ്.