കോട്ടയം: വിദേശസംഭാവന നിയന്ത്രണ നിയമത്തിലെ (FCRA) ഭേദഗതിയുമായി ബന്ധപ്പെട്ട ആശങ്കയറിയിച്ച ക്രൈസ്തവ സഭാനേതൃത്വത്തിനെതിരെ രൂക്ഷമായ ഭാഷയില്‍ അധിക്ഷേപവുമായി എന്‍ഡിഎ സ്ഥാനാര്‍ത്ഥിയും ബിജെപി നേതാവുമായ പി.സി. ജോര്‍ജ്. 'ബിഷപ്പുമാര്‍ ഊളത്തരം പറയുകയാണെന്നും അവര്‍ക്ക് തലയ്ക്ക് സ്ഥിരതയില്ലെന്നും' അദ്ദേഹം ആരോപിച്ചു. കോട്ടയത്ത് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

കോണ്‍ഗ്രസ് വരണമെന്ന അബദ്ധവിചാരവുമായി നടക്കുന്ന ചില പിതാക്കന്മാരാണ് നിയമഭേദഗതിയില്‍ ഇല്ലാത്ത ആശങ്കകള്‍ പരത്തുന്നതെന്ന് പി.സി. ജോര്‍ജ് പറഞ്ഞു. 'കുറച്ച് പിതാക്കന്മാര്‍ എന്ത് ഊളത്തരവും പറഞ്ഞു നടക്കുകയാണ്. ബിജെപി എന്ന് കേട്ടാല്‍ അവര്‍ക്ക് ഹാലിളകും. അവര്‍ പറയുന്ന കാര്യങ്ങള്‍ താനോ ക്രൈസ്തവ സമൂഹമോ പരിഗണിക്കുന്നില്ല,' അദ്ദേഹം വ്യക്തമാക്കി. നിയമഭേദഗതിയില്‍ ആര്‍ക്കും ആശങ്ക വേണ്ടെന്നും അദ്ദേഹം കൂട്ടിച്ചേര്‍ത്തു.

രാജ്യത്തെ ക്രൈസ്തവ ജനസംഖ്യയെയും ബിജെപിയുമായുള്ള ബന്ധത്തെയും കുറിച്ച് വിവാദപരമായ പരാമര്‍ശങ്ങളും അദ്ദേഹം നടത്തി. 'രാജ്യത്ത് രണ്ടേകാല്‍ ശതമാനം മാത്രമാണ് ക്രിസ്ത്യാനികള്‍. ബിജെപിയുടെ മാന്യത കൊണ്ടാണ് ക്രിസ്ത്യാനികളെ ചുമന്നുകൊണ്ടുനടക്കുന്നത്. ക്രിസ്ത്യാനികളെ ഇത്രയും കൂടുതല്‍ അംഗീകരിച്ച മറ്റൊരു രാഷ്ട്രീയ പാര്‍ട്ടിയുമില്ല.'

കോണ്‍ഗ്രസ് ഭരിച്ച കാലഘട്ടത്തില്‍ പോലും ഇത്രയധികം ക്രൈസ്തവ മുഖ്യമന്ത്രിമാര്‍ ഉണ്ടായിട്ടില്ലെന്ന് അവകാശപ്പെട്ട ജോര്‍ജ്, ഇതൊക്കെ മറച്ചുവെച്ചാണ് ബിഷപ്പുമാര്‍ ഇത്തരം നിലപാടുകള്‍ സ്വീകരിക്കുന്നതെന്നും കുറ്റപ്പെടുത്തി. തിരഞ്ഞെടുപ്പ് പ്രചാരണം മുറുകുന്നതിനിടെ സഭാനേതൃത്വത്തിനെതിരെ പി.സി. ജോര്‍ജ് നടത്തിയ ഈ പരാമര്‍ശങ്ങള്‍ രാഷ്ട്രീയ കേന്ദ്രങ്ങളില്‍ വലിയ ചര്‍ച്ചകള്‍ക്ക് വഴിവെച്ചിട്ടുണ്ട്.