ന്യൂഡല്‍ഹി: എന്‍ജിന്‍ തകരാര്‍ സംശയിച്ചതിനെത്തുടര്‍ന്ന് വിശാഖപട്ടണത്ത് നിന്നുള്ള ഇന്‍ഡിഗോ വിമാനം ശനിയാഴ്ച ഡല്‍ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ അടിയന്തരമായി ഇറക്കി. 161 യാത്രക്കാരുമായി എത്തിയ വിമാനം സുരക്ഷിതമായി ലാന്‍ഡ് ചെയ്തതോടെ വലിയൊരു അപകടം ഒഴിവായി.

വിമാനം ലാന്‍ഡ് ചെയ്യുന്നതിന് മുന്നോടിയായി വിമാനത്താവളത്തില്‍ പൂര്‍ണ്ണമായ അടിയന്തരാവസ്ഥ (Full Emergency) പ്രഖ്യാപിച്ചിരുന്നു. എന്‍ജിന്‍ തകരാറിനെക്കുറിച്ച് പൈലറ്റ് സന്ദേശം നല്‍കിയ ഉടന്‍ തന്നെ വിമാനത്താവള അധികൃതര്‍ സുരക്ഷാ പ്രോട്ടോക്കോളുകള്‍ സജീവമാക്കി. വിമാനത്താവളത്തിലെ റണ്‍വേ 28 അതീവ ജാഗ്രതയിലായിരുന്നു.

രാവിലെ 11 മണിയോടെയാണ് വിമാനം റണ്‍വേയില്‍ തൊട്ടത്. വിമാനത്തിലുണ്ടായിരുന്ന 161 യാത്രക്കാരെയും സുരക്ഷിതമായി പുറത്തെത്തിച്ചു. വിമാനം ലാന്‍ഡ് ചെയ്യുന്ന സമയത്ത് ഫയര്‍ എഞ്ചിനുകളും ആംബുലന്‍സുകളും റണ്‍വേയ്ക്ക് സമീപം സജ്ജമാക്കിയിരുന്നു. സാങ്കേതിക തകരാറിനെക്കുറിച്ച് കൂടുതല്‍ അന്വേഷണം നടത്തിവരികയാണെന്ന് അധികൃതര്‍ അറിയിച്ചു.