റിയാദ്- കിംഗ് സല്‍മാന്‍ ഹ്യൂമാനിറ്റേറിയന്‍ എയ്ഡ് ആന്റ് റിലീഫ് സെന്റര്‍ ജിബൂട്ടിയിലും ഗിനിയിലും പുതിയ ഭക്ഷണ വിതരണ പദ്ധതികള്‍ക്ക് തുടക്കം കുറിച്ചു. രണ്ട് രാജ്യങ്ങളിലുമായി ഏകദേശം 90,000-ത്തോളം പേര്‍ക്ക് സഹായം ലഭിക്കുമെന്നാണ് കണക്കാക്കുന്നത്. അവശ്യസാധനങ്ങളടങ്ങിയ ഭക്ഷ്യകിറ്റുകളാണ് വിതരണം ചെയ്യുന്നത്.

ലോകത്തെ ഏറ്റവും വലിയ മാനുഷിക സഹായ ഏജന്‍സികളിലൊന്നായി കെഎസ് റിലീഫ് വളര്‍ന്നിരിക്കുകയാണ്. നിലവില്‍ 113-ലധികം രാജ്യങ്ങളില്‍ സൗദിയുടെ സഹായ പദ്ധതികള്‍ നടന്നുവരുന്നു. രാഷ്ട്രീയമോ മതപരമോ ആയ വിവേചനങ്ങളില്ലാതെയാണ് ഇത്തരം സേവനങ്ങള്‍ നല്‍കുന്നതെന്ന് അധികൃതര്‍ വ്യക്തമാക്കി.

ദാരിദ്ര്യവും പട്ടിണിയും അനുഭവിക്കുന്ന രാജ്യങ്ങളിലെ ജനങ്ങളുടെ ജീവിതസാഹചര്യങ്ങള്‍ മെച്ചപ്പെടുത്തുന്നതില്‍ സൗദി അറേബ്യ വഹിക്കുന്ന പങ്കിനെ ഐക്യരാഷ്ട്രസഭ ഉള്‍പ്പെടെയുള്ള സംഘടനകള്‍ നേരത്തെയും അഭിനന്ദിച്ചിട്ടുണ്ട്.