ഡബ്ലിന്‍: ഉപരിപഠനത്തിനും ജോലിക്കുമായി അയര്‍ലന്‍ഡിലെത്തുന്ന പ്രവാസികളെ നടുക്കി മലയാളി യുവാവിന്റെ മരണം. മലയാളിയായ മംഗലാപുരം സ്വദേശി സാന്‍ജോ സുനിലിനെ (31) ആണ് ഡബ്ലിന്‍ ഫിന്‍ഗ്ലാസിലെ ചാള്‍സ് ടൗണിലുള്ള താമസസ്ഥലത്ത് മരിച്ച നിലയില്‍ കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം.
സംഭവത്തെത്തുടര്‍ന്ന് സാന്‍ജോയുടെ ഭാര്യ ലിഷ്മ ഫിലിപ്പിനെ ഗുരുതരാവസ്ഥയില്‍ ആശുപത്രിയില്‍ പ്രവേശിച്ചു. നഴ്സായി ജോലി ചെയ്യുന്ന ലിഷ്മ നിലവില്‍ അപകടനില തരണം ചെയ്തതായാണ് ലഭിക്കുന്ന വിവരം.
കഴിഞ്ഞ വര്‍ഷമായിരുന്നു സാന്‍ജോയുടെയും ലിഷ്മയുടെയും വിവാഹം. നേരത്തെ ഇസ്രയേലില്‍ ജോലി ചെയ്തിരുന്ന സാന്‍ജോ, ഒരു മാസം മുന്‍പാണ് ഡിപെന്‍ഡന്റ് വിസയില്‍ ഭാര്യക്കൊപ്പം താമസിക്കാന്‍ അയര്‍ലന്‍ഡിലെത്തിയത്. ചുരുങ്ങിയ കാലയളവിനുള്ളില്‍ തന്നെ ഡബ്ലിനിലെ പ്രാദേശിക മലയാളി സമൂഹത്തിലും ക്രിക്കറ്റ് കൂട്ടായ്മകളിലും സാന്‍ജോ സജീവമായിരുന്നു.
സാന്‍ജോയുടെ അപ്രതീക്ഷിത മരണം സുഹൃത്തുക്കളെയും സഹപ്രവര്‍ത്തകരെയും ദുഃഖത്തിലാഴ്ത്തി. മൃതദേഹം നിലവില്‍ പോലീസ് നടപടികള്‍ക്കായി മാറ്റിയിരിക്കുകയാണ്. ഔദ്യോഗിക നടപടിക്രമങ്ങള്‍ പൂര്‍ത്തിയാക്കിയ ശേഷം സംസ്‌കാരം സംബന്ധിച്ച തീരുമാനമുണ്ടാകുമെന്ന് ബന്ധുക്കള്‍ അറിയിച്ചു. കര്‍ണാടകയിലെ മംഗലാപുരത്തുള്ള മലയാളി കുടുംബാംഗങ്ങളാണ് ഇരുവരും. ഇവര്‍ക്ക് ആവശ്യമായ പിന്തുണയുമായി പ്രാദേശിക മലയാളി സംഘടനകള്‍ രംഗത്തുണ്ട്.
.jpg)
Related News
