ദോഹ: പ്രവര്‍ത്തന മികവിന് ഖത്തര്‍ എയര്‍വെയ്സ് 2025ലെ സര്‍ക്യൂം എയര്‍ലൈന്‍ പ്ലാറ്റിനം അവാര്‍ഡ് നേടി. വിമാന ഗതാഗത വിശകലന സ്ഥാപനമായ സര്‍ക്യൂം (Cirium) പുറത്തിറക്കിയ റിപ്പോര്‍ട്ടിലാണ് ഈ അംഗീകാരം. ആറ് ഭൂഖണ്ഡങ്ങളിലായി നടത്തിയ, ഏകദേശം രണ്ട് ലക്ഷം സര്‍വീസുകളില്‍ 84.42 ശതമാനം സമയപാലനം എയര്‍ലൈന്‍ കൈവരിച്ചു. കഴിഞ്ഞ വര്‍ഷത്തേക്കാള്‍ മികച്ച പ്രകടനമാണിതെന്ന് റിപ്പോര്‍ട്ട് പറയുന്നു. കാലാവസ്ഥാ തടസ്സങ്ങളും മറ്റ് വെല്ലുവിളികളും നേരിട്ടിട്ടും സര്‍വീസുകള്‍ കാര്യക്ഷമമായി നടത്താന്‍ ഖത്തര്‍ എയര്‍വെയ്സിന് കഴിഞ്ഞതായി സര്‍ക്യൂം വ്യക്തമാക്കി.

ഇതിനൊപ്പം 2025ലെ ലോകത്തിലെ മികച്ച എയര്‍ലൈന്‍ എന്ന സ്‌കൈട്രാക്‌സ് അംഗീകാരവും ഖത്തര്‍ എയര്‍വെയ്സിന് ലഭിച്ചിട്ടുണ്ട്. നിലവില്‍ 170ലധികം കേന്ദ്രങ്ങളിലേക്കാണ് എയര്‍ലൈന്‍ സര്‍വീസ് നടത്തുന്നത്. അതേസമയം, ഹമദ് ഇന്റര്‍നാഷണല്‍ വിമാനത്താവളം 84.70 ശതമാനം സമയപാലനത്തോടെ സര്‍ക്യൂമിന്റെ ടോപ് 10 വലിയ വിമാനത്താവള പട്ടികയില്‍ ഇടം നേടി.