ഹരിയാന: ആഡംബര കാര്‍ വാങ്ങുന്നവര്‍ മാത്രം ലക്ഷ്യമിടുന്ന വിഐപി വാഹന രജിസ്‌ട്രേഷന്‍ നമ്പറുകള്‍ക്ക് വേണ്ടി ഹരിയാനയില്‍ നടന്ന ഓണ്‍ലൈന്‍ ലേലത്തില്‍ ചരിത്ര നേട്ടം. വാഹനം സ്വന്തമായിട്ടില്ലാത്ത ഒരാളാണ് ഒരു കോടി 17 ലക്ഷം രൂപയ്ക്ക് 'HR88B8888' എന്ന ഫാന്‍സി നമ്പര്‍ സ്വന്തമാക്കിയത്. ഹരിയാനയിലെ സോണിപത്തില്‍ നടന്ന ഫോര്‍ വീലര്‍ വാഹനങ്ങളുടെ വിഐപി നമ്പര്‍ ലേലമാണ് ഇത്തവണ റെക്കോര്‍ഡുകള്‍ തകര്‍ത്തത്.


സോണിപത് ജില്ലയിലെ കുണ്ഡ്ലി RTO സീരീസിന് കീഴിലുള്ള 'HR88B8888' എന്ന നമ്പറാണ് 1,17,00,000 രൂപയ്ക്ക് ലേലം ചെയ്തത്. ഈ നമ്പറിന്റെ ആകര്‍ഷണം എട്ട് സംഖ്യകളുടെ തുടര്‍ച്ചയായുള്ള ശ്രേണിയാണ്. ഇതിലെ 'B' എന്ന ഇംഗ്ലീഷ് അക്ഷരം പോലും വലിയക്ഷരത്തില്‍ '8' എന്നതിന് സമാനമായതിനാല്‍ നമ്പര്‍ പ്ലേറ്റ് പൂര്‍ണ്ണമായും എട്ടുകളുടെ ഒരു നിരയായി കാണപ്പെടുന്നു.

വിശ്വാസം: സംഖ്യാശാസ്ത്ര പ്രേമികളും ആഡംബര കാര്‍ വാങ്ങുന്നവരും ശുഭകരമെന്ന് വിശ്വസിക്കുന്ന ഇത്തരം കോമ്പിനേഷനുകള്‍ക്ക് വേണ്ടി വലിയ തുക മുടക്കാന്‍ തയ്യാറാകാറുണ്ട്. ലേലത്തില്‍ കടുത്ത മത്സരം നേരിട്ട നമ്പര്‍, അടിസ്ഥാന വിലയായ 50,000 രൂപയില്‍ നിന്നാണ് കോടികളിലേക്ക് കുതിച്ചത്.

റിപ്പോര്‍ട്ടുകള്‍ പ്രകാരം ഹിസാറില്‍ നിന്നുള്ള സുധീര്‍ കുമാര്‍ എന്നയാളാണ് ഇന്ത്യയിലെ ഏറ്റവും വിലയേറിയ ഈ ഫാന്‍സി നമ്പര്‍ സ്വന്തമാക്കിയത്. എന്നാല്‍, സുധീറിന് ഇതുവരെ സ്വന്തമായി ഒരു വാഹനം ഇല്ലായിരുന്നുവെന്നും 'നമ്പര്‍ ഇഷ്ടപ്പെട്ടു, അതുകൊണ്ട് വാങ്ങി' എന്ന് മാത്രമാണ് ഇദ്ദേഹം പ്രതികരിച്ചതെന്നും റിപ്പോര്‍ട്ടുകള്‍ സൂചിപ്പിക്കുന്നു.