It's between you and a book.ഒരു പുസ്തകത്തിനും നമ്മള്‍ക്കും ഇടയില്‍ എന്താണ് സംഭവിക്കുന്നത് ഹൃദയം താങ്ങി നിശബ്ദമായി നിഗൂഡമായി രഹസ്യാത്മകമായി മാത്രം ചോദിക്കുന്ന വല്ലാത്ത ഒരു ചോദ്യമാണിത്.

ഒരു പുസ്തകത്തിനും നമുക്കുമിടയില്‍ എന്താണ് സംഭവിക്കുന്നത് എന്ന് നെഞ്ചില്‍ വിരല്‍ ചൂണ്ടിയ ഉജ്ജ്വലമായ ഒരു ചോദ്യം ' അതാണ് ഈ തവണത്തെ ഷാര്‍ജ അന്താരാഷ്ട്ര പുസ്തകോത്സവത്തിന്റെ സന്ദേശമായി ഉയര്‍ത്തപ്പെട്ട ചോദ്യം...

അതെ പുസ്തകത്തിനും നമ്മള്‍ക്കും ഇടയില്‍ മറ്റൊരാളില്ല.' അത് ആത്മാന്വേഷണത്തിന്റെ, ചിന്തയുടെ, അനുഭവങ്ങളുടെ ലോകമാണ്.
ഒരു പുസ്തകം വായിക്കുമ്പോള്‍, നാം അതിന്റെ അക്ഷരങ്ങളിലൂടെ സ്വയം മറ്റാരോടും പങ്കുവെക്കാന്‍ പറ്റാത്ത ആശയത്തിന്റെ വിശാലമായ ആകാശവും ചിന്തകളുടെ സാഗരത്തിന്റെ അലകളും അനുഭവിക്കുന്നു...

ഷാര്‍ജ അന്താരാഷ്ട്ര പുസ്തകോത്സവത്തിന്റെ ഇപ്രാവശ്യത്തെ സന്ദേശം നമ്മെ ഓര്‍മ്മപ്പെടുത്തുന്നത്
പുസ്തകങ്ങള്‍ വെറും അറിവിന്റെ ശേഖരമല്ല - അവ മനുഷ്യന്റെ ആത്മാവുമായി നടത്തുന്ന സംഭാഷണമാണ്.

പുസ്തകം തുറക്കുമ്പോള്‍ നമ്മള്‍ നമ്മുടെ ഉള്ളിലേക്കാണ് തന്നെയാണ് തുറക്കുന്നത് അതാണ് അതിന്റെ രഹസ്യാത്മകത :

ഒരു പുസ്തകം അറിവിന്റെ വൈവിദ്ധ്യം മാത്രമല്ല ഹൃദത്തില്‍ ജ്ഞാനത്തിന്റെ അത്ഭുതകരമായ വെളിച്ചത്തിന്റെ പ്രളയം തീര്‍ത്ത് നമ്മെ എന്തൊക്കെയോ ആക്കിമാറ്റിയിട്ടുണ്ട്. 'നമ്മെ നാം ആക്കിയതിലും നാമല്ലാതാവുന്നതിന്റെ പിന്നിലും ഏതോ ഒരു ബുക്ക് നാം പോലും അറിയാതെ നമ്മില്‍ പ്രവര്‍ത്തിച്ചിട്ടുണ്ട് '

അതുകൊണ്ടാണ് 44ാമത് അന്താരാഷ്ട്ര പുസ്തകോത്സവത്തിന്റെ മുന്നില്‍ കുറിക്കപ്പെട്ടിരിക്കുന്ന ഈ ചോദ്യം എന്തുകൊണ്ടും പ്രസക്തമാകുന്നത്....

മലമുകളിലെ ഹിറ ഗുഹയുടെ ഇരുട്ടിന്റെ ഗഹ്വരത്തില്‍ പ്രത്യക്ഷപ്പെട്ട് വായിക്ക് എന്ന് പറഞ്ഞപ്പോള്‍ വായിക്കാന്‍ അറിയാവുന്ന ആളല്ല ഞാനൊന്ന് പറഞ്ഞൊഴിഞ്ഞു മാറാന്‍ ശ്രമിക്കുന്നുണ്ട് പ്രവാചകന്‍'

പക്ഷേ പിന്നീട് പരിശുദ്ധ മാലാഖ ഹൃദയത്തോട് ചേര്‍ത്തു പിടിച്ചാണ് ഇഖ്‌റഅ് മെഴിഞ്ഞത് ' കണ്ണ് കണ്ടു നോക്കി അക്ഷരങ്ങള്‍ അല്ല വായിച്ചത് എന്ന് ഉറപ്പാണ് എന്നാല്‍ അറിയാന്‍ ഒന്നുമില്ലാത്ത വിധം പ്രപഞ്ച സത്യങ്ങള്‍ക്ക് വെളിപ്പെടുന്ന വായനയാണല്ലോ പ്രവാചകനും ഗ്രന്ഥത്തിനും ഇടയില്‍ സംഭവിച്ചത് '

അതെ..'' വെളിച്ചവുമായി വന്നവരൊക്കെ ബുക്ക് എന്ന വിളക്കുമായി വന്നവരായിരുന്നല്ലോ

-ബഷീര്‍ വടകര