വാഷിംഗ്ടണ്‍ ഡി.സി.: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനുവേണ്ടി പുതിയൊരു വിരുന്നുമുറി (ഔദ്യോഗിക വിരുന്നുകള്‍ക്കായുള്ള വിശാലമായ ഹാള്‍) നിര്‍മ്മിക്കുന്നതിനായി വൈറ്റ് ഹൗസിന്റെ ഒരു ഭാഗം പൊളിച്ചുമാറ്റുന്നു. ഒരു നൂറ്റാണ്ടിനിടെ വൈറ്റ് ഹൗസില്‍ നടക്കുന്ന ഏറ്റവും വലിയ നിര്‍മ്മാണ പദ്ധതികളില്‍ ഒന്നാണിത്.

പുതിയ നിര്‍മ്മാണ പ്രവര്‍ത്തനങ്ങള്‍ ആരംഭിച്ചതായി പ്രസിഡന്റ് ഡൊണാള്‍ഡ് ട്രംപ് തന്റെ സോഷ്യല്‍ മീഡിയ പ്ലാറ്റ്ഫോമായ 'ട്രൂത്ത് സോഷ്യലി'ലൂടെ അറിയിച്ചു.

'വൈറ്റ് ഹൗസില്‍ വലുതും, മനോഹരവും, പുതിയതുമായ സ്റ്റേറ്റ് റൂമിന്റെ നിര്‍മ്മാണം ആരംഭിച്ചതായി പ്രഖ്യാപിക്കുന്നതില്‍ എനിക്ക് സന്തോഷമുണ്ട്.'

വാര്‍ത്താ ഏജന്‍സിയായ എ.എഫ്.പി.യുടെ ലേഖകര്‍ പ്രസിഡന്റിന്റെ ഔദ്യോഗിക വസതിയുടെ ഈസ്റ്റ് വിങ് ബുള്‍ഡോസറുകള്‍ ഉപയോഗിച്ച് പൊളിച്ചുമാറ്റുന്നത് നേരില്‍ കണ്ടു. ഏകദേശം 250 മില്യണ്‍ ഡോളര്‍ (25 കോടി ഡോളര്‍) ചെലവ് പ്രതീക്ഷിക്കുന്ന പദ്ധതിയാണിത്. പുതിയ ബോള്‍റൂമിന് 8,000 ചതുരശ്ര മീറ്ററിലധികം വിസ്തീര്‍ണ്ണമുണ്ടാകും.
ഏകദേശം 1,000 ആളുകളെ ഉള്‍ക്കൊള്ളാന്‍ ഈ ഹാളില്‍ സാധിക്കും.
വിദേശ രാഷ്ട്രത്തലവന്മാരെ ആദരിക്കുന്നതിനുള്ള ഗംഭീര വിരുന്നുകള്‍ക്കും മറ്റ് പ്രധാന പരിപാടികള്‍ക്കുമായാണ് ഹാള്‍ ഉപയോഗിക്കുക.
1800 മുതല്‍ അമേരിക്കന്‍ പ്രസിഡന്റുമാരുടെ വസതിയും ജോലിസ്ഥലവുമാണ് വൈറ്റ് ഹൗസ്. അമേരിക്കയുടെ രണ്ടാമത്തെ പ്രസിഡന്റായ ജോണ്‍ ആഡംസാണ് ഈ വസതിയില്‍ ആദ്യമായി താമസിച്ചത്.