റിയാദ്: സൗദി അറേബ്യയിലെ പ്രമുഖ വ്യോമഗതാഗത കേന്ദ്രങ്ങളിലൊന്നായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ വീണ്ടും ഉണ്ടായ ആക്രമണത്തില്‍ നിരവധി പേര്‍ക്ക് പരിക്കേറ്റു. ആക്രമണത്തെത്തുടര്‍ന്ന് നാശനഷ്ടങ്ങള്‍ വിലയിരുത്തുന്നതിനായി വിമാനത്താവളത്തിന്റെ പ്രവര്‍ത്തനം താല്‍ക്കാലികമായി നിര്‍ത്തിവെച്ചതായി സൗദി സിവില്‍ ഏവിയേഷന്‍ അതോറിറ്റി (GACA) അറിയിച്ചു. 'രാജ്യത്തെ സിവില്‍ വ്യോമയാന കേന്ദ്രങ്ങളെ ലക്ഷ്യമിട്ടുള്ള നിരന്തരമായ ആക്രമണങ്ങളുടെ തുടര്‍ച്ചയാണിത്. ആക്രമണത്തില്‍ നിരവധി പേര്‍ക്ക് പരിക്കേറ്റിട്ടുണ്ട്, പരിക്കേറ്റവരുടെ കൃത്യമായ എണ്ണം കണക്കാക്കിവരികയാണെന്ന് അതോറിറ്റി പറഞ്ഞു.

കഴിഞ്ഞ വ്യാഴാഴ്ച യെമനിലെ ഹൂത്തി മിലിറ്റന്റുകള്‍ നടത്തിയ ആക്രമണത്തില്‍ സൗദി എയര്‍ലൈന്‍സിന്റെ ഒരു പൈലറ്റ് ഉള്‍പ്പെടെ മൂന്ന് പേര്‍ കൊല്ലപ്പെട്ടിരുന്നു. ബുധനാഴ്ച കിംഗ് ഖാലിദ് വിമാനത്താവളത്തിലുണ്ടായ മറ്റൊരു ആക്രമണത്തില്‍ സുഡാന്‍ സ്വദേശിയും, ചൊവ്വാഴ്ച അസീര്‍ പ്രവിശ്യയിലെ അബഹ അന്താരാഷ്ട്ര വിമാനത്താവളത്തിന് നേരെയുണ്ടായ ആക്രമണത്തില്‍ രണ്ട് സ്ത്രീകളും കൊല്ലപ്പെട്ടിരുന്നു.

സിവിലിയന്‍ അടിസ്ഥാന സൗകര്യങ്ങളെ ലക്ഷ്യമിടുന്നതില്‍ നിന്ന് ഇറാന്‍ പിന്തുണയുള്ള ഹൂതി ഗ്രൂപ്പ് പിന്മാറണമെന്ന് ആവശ്യപ്പെട്ട് അന്താരാഷ്ട്ര സമൂഹം ശക്തമായ പ്രതിഷേധം രേഖപ്പെടുത്തി. സംഭവത്തെത്തുടര്‍ന്ന് ഹൂതികള്‍ക്കെതിരെ വ്യാപക തിരിച്ചടി ആരംഭിച്ചതായും 130-ലധികം കേന്ദ്രങ്ങള്‍ തകര്‍ത്തതായും യെമനിലെ നിയമാനുസൃത സര്‍ക്കാരിനെ പിന്തുണയ്ക്കുന്ന സഖ്യസേന അറിയിച്ചു.