അല്‍കോബാര്‍ - ഇസ്ലാമിന്റെ അടിസ്ഥാന പ്രമാണമായ തൗഹീദിന്റെ സത്തക്ക് വിരുദ്ധമായി കടന്നുവരുന്ന ലിബറല്‍ സൂഫിസം പോലുള്ള നൂതന ചിന്താഗതികള്‍ വിശ്വാസ രംഗത്ത് വൈകല്യങ്ങള്‍ സൃഷ്ടിക്കുമെന്നു കെ.എന്‍.എം. വൈസ് പ്രസിഡണ്ട് ഹുസൈന്‍ മടവൂര്‍. സൗദി ഈസ്റ്റേണ്‍ പ്രൊവിന്‍സ് ഇന്ത്യന്‍ ഇസ്ലാഹീ സെന്ററുകള്‍ സംയുക്തമായി സംഘടിപ്പിച്ച പ്രത്യേക പരിപാടിയില്‍ സംസാരിക്കുകയായിരുന്നു അദ്ദേഹം.
മതനിരാസവും, ലിബറല്‍ ചിന്താഗതിയും, കുത്തഴിഞ്ഞ ലൈംഗികതയും സജീവമാകുന്ന ഇക്കാലത്ത് ഇസ്ലാമിന്റെ മൗലിക വിശ്വാസങ്ങളെയും ആരാധനകളെയും വികൃതമായി പ്രകടിപ്പിക്കുന്ന നവ സ്വതന്ത്ര സൂഫിസവും തലയുയര്‍ത്തുന്നുണ്ട്. അതിനെതിരില്‍ പ്രാമാണികമായ പ്രതിരോധവും ജാഗ്രതയോടെയുള്ള പ്രബോധനവും അനിവാര്യമാണെന്ന് അദ്ദേഹം ഓര്‍മിപ്പിച്ചു.
നാനാ ദിക്കുകളില്‍ നിന്നും അനവധി മുസ്ലിംകള്‍ സദാ ലക്ഷ്യം വെച്ചെത്തുന്ന രണ്ട് പവിത്ര മസ്ജിദുകളുള്ള സൗദിയില്‍ പ്രവാസി സഹോദരങ്ങള്‍ക്ക് ഇസ്ലാമിന്റെ ആദര്‍ശം പകര്‍ന്നു നല്‍കുന്നതില്‍ ഇസ്ലാഹീ സെന്ററുകളുടെ സജീവ ശ്രദ്ധയുണ്ടാകണമെന്നും അദ്ദേഹം പറഞ്ഞു. സൗദീ മാനവ വിഭവശേഷി സാമൂഹിക വികസന മന്ത്രാലയം റിയാദില്‍ സംഘടിപ്പിച്ച ഗ്ലോബല്‍ സി.എസ്.ആര്‍ ഫോറത്തില്‍ പങ്കെടുക്കാന്‍ എത്തിയതായിരുന്നു ഹുസൈന്‍ മടവൂര്‍.
അല്‍കോബാര്‍ ഇന്ത്യന്‍ ഇസ്ലാഹീ സെന്ററില്‍ നടന്ന പരിപാടിയില്‍ നാഷണല്‍ കമ്മിറ്റി ജനറല്‍ സെക്രട്ടറി മുഹമ്മദ് കബീര്‍ സലഫി സ്വാഗതവും കോബാര്‍ ഹിദായ ജാലിയാത്ത് പ്രബോധകന്‍ അജ്മല്‍ മദനി നന്ദിയും പറഞ്ഞു. ഇന്ത്യന്‍ ഇസ്ലാഹീ സെന്റര്‍ ഈസ്റ്റേണ്‍ പ്രൊവിന്‍സ് കമ്മിറ്റി പ്രസിഡണ്ട് സകരിയ്യ മങ്കട അധ്യക്ഷനായിരുന്നു.
.jpg)
Related News
