കോഴിക്കോട്: ഭൗതികശാസ്ത്രത്തിനുള്ള 2026ലെ നൊബേല്‍ സമ്മാനം നേടിയ ശാസ്ത്രജ്ഞന്‍ ഫ്രാന്‍സിസ് ഹാല്‍സന്റെ ഗവേഷകസംഘത്തില്‍ മലയാളി സാന്നിധ്യം. കോഴിക്കോട് ചാലപ്പുറത്തെ കീര്‍ത്തിനഗര്‍ സ്വദേശിനിയായ വി. അശ്വതി ബാലഗോപാലാണ് ഹാല്‍സന്റെ നേതൃത്വത്തില്‍ ആസ്‌ട്രോഫിസിക്കല്‍ ന്യൂട്രിനോകളെ കണ്ടെത്താനുള്ള ഗവേഷണത്തില്‍ സജീവമായിരിക്കുന്നത്. നൊബേല്‍ പുരസ്‌കാരത്തിന് അര്‍ഹമായ ഗവേഷണപ്രബന്ധത്തില്‍ അശ്വതിയുടെ രണ്ട് കണ്ടെത്തലുകളും ഉള്‍പ്പെട്ടിട്ടുണ്ടെന്നത് കേരളത്തിന് അഭിമാനമായി.
കഴിഞ്ഞ അഞ്ച് വര്‍ഷമായി അശ്വതി ഹാല്‍സന്റെ സംഘത്തോടൊപ്പം ഗവേഷണം നടത്തിവരികയാണ്. അമേരിക്കയിലെ വിസ്‌കോണ്‍സിന്‍-മാഡിസണ്‍ സര്‍വകലാശാലയില്‍ പോസ്റ്റ് ഡോക്ടറല്‍ ഗവേഷകയായാണ് അവര്‍ പ്രവര്‍ത്തിക്കുന്നത്. വിവിധ രാജ്യങ്ങളില്‍ നിന്നുള്ള മുന്നൂറോളം ഗവേഷകര്‍ ഉള്‍പ്പെടുന്ന സംഘമാണ് ഹാല്‍സന്റെ നേതൃത്വത്തില്‍ ന്യൂട്രിനോ ഗവേഷണം നടത്തുന്നത്.
കോഴിക്കോട്ടെ പ്രൊവിഡന്‍സ് സ്‌കൂളിലായിരുന്നു അശ്വതിയുടെ സ്‌കൂള്‍ വിദ്യാഭ്യാസം. തുടര്‍ന്ന് ദേവഗിരി കോളജില്‍നിന്ന് ഫിസിക്‌സില്‍ ബിരുദം നേടി. ജര്‍മനിയിലെ കാള്‍സ്‌റൂ ഇന്‍സ്റ്റിറ്റിയൂട്ട് ഓഫ് ടെക്‌നോളജിയില്‍നിന്ന് പിഎച്ച്.ഡി.യും കരസ്ഥമാക്കി. അതിനുശേഷമാണ് അമേരിക്കയിലെ ഗവേഷകസംഘത്തില്‍ ചേര്‍ന്നത്.
പ്രപഞ്ചത്തിലെ അതിശക്തമായ പ്രതിഭാസങ്ങളില്‍നിന്ന് ഉത്ഭവിക്കുന്ന ഉയര്‍ന്ന ഊര്‍ജമുള്ള ന്യൂട്രിനോകളെ കണ്ടെത്താനുള്ള ഗവേഷണത്തിനാണ് ഫ്രാന്‍സിസ് ഹാല്‍സന് 2026ലെ ഭൗതികശാസ്ത്ര നൊബേല്‍ ലഭിച്ചത്. ദക്ഷിണധ്രുവത്തിലെ അന്റാര്‍ട്ടിക് ഹിമപാളികള്‍ക്കടിയില്‍ സ്ഥാപിച്ച ഐസ്‌ക്യൂബ് ന്യൂട്രിനോ നിരീക്ഷണകേന്ദ്രം ഈ ഗവേഷണത്തില്‍ നിര്‍ണായക പങ്കുവഹിച്ചു. പ്രപഞ്ചത്തിന്റെ വിദൂര ഭാഗങ്ങളില്‍ നടക്കുന്ന പ്രതിഭാസങ്ങളെക്കുറിച്ച് കൂടുതല്‍ മനസ്സിലാക്കാന്‍ ന്യൂട്രിനോ പഠനം സഹായിക്കുന്നു.
ന്യൂട്രിനോ ഗവേഷണത്തിന്റെ ഫലങ്ങള്‍ മനുഷ്യരാശിക്ക് പ്രയോജനപ്പെടുന്ന കണ്ടെത്തലുകളിലേക്ക് നയിക്കാന്‍ പതിറ്റാണ്ടുകള്‍ വേണ്ടിവന്നേക്കാമെന്നാണ് അശ്വതിയുടെ വിലയിരുത്തല്‍.
ചാര്‍ട്ടേഡ് അക്കൗണ്ടന്റായ പി. ബാലഗോപാലിന്റെയും രശ്മിയുടെയും മകളാണ് അശ്വതി. ആശിഖ് ശശീന്ദ്രനാണ് ഭര്‍ത്താവ്. ലോകശ്രദ്ധ നേടിയ ശാസ്ത്രഗവേഷണത്തില്‍ മലയാളി ഗവേഷകയുടെ സംഭാവനകള്‍ കൂടി ഇടംപിടിക്കുന്നത് കേരളത്തിന്റെ ശാസ്ത്രരംഗത്തിനും അഭിമാനനിമിഷമാണ്.
.jpg)
Related News
