റിയാദ്: സമാധാന ചര്‍ച്ചകളിലെ അവസരങ്ങളെല്ലാം അവസാനിച്ചതായും, യെമനില്‍ ഭരണകൂടത്തെ പുനഃസ്ഥാപിക്കുന്ന നിര്‍ണായക ഘട്ടത്തിലേക്ക് സര്‍ക്കാര്‍ കടന്നിരിക്കുകയാണെന്നും യെമന് വിദേശകാര്യ മന്ത്രിയും പ്രവാസികാര്യ മന്ത്രിയുമായ അഫ്ര അല്‍-സൂബ വ്യക്തമാക്കി. 'അര്‍ഷ് അല്‍-ഔസത്' പത്രത്തിന് നല്‍കിയ അഭിമുഖത്തിലാണ് അവര്‍ ഇക്കാര്യം വ്യക്തമാക്കിയത്.
ഏതെങ്കിലും സായുധ സംഘവുമായി അധികാരം പങ്കുവെക്കുന്നതിലല്ല, മറിച്ച് ഭരണകൂട സ്ഥാപനങ്ങളുടെ തിരിച്ചുവരവിലും ആയുധങ്ങളുടെയും യുദ്ധ-സമാധാന തീരുമാനങ്ങളുടെയും മേല്‍ സര്‍ക്കാരിനുള്ള സമ്പൂര്‍ണ്ണ നിയന്ത്രണത്തിലുമാണ് ഭാവിയിലെ രാഷ്ട്രീയ പ്രക്രിയ അവസാനിക്കേണ്ടതെന്ന് മന്ത്രി വ്യക്തമാക്കി.
ആയുധങ്ങള്‍ ഭരണകൂടത്തിന് പുറത്തുനിര്‍ത്തുന്ന സമാധാനത്തിന്റെ വ്യാമോഹങ്ങള്‍ വെടിഞ്ഞതായി മന്ത്രി പറഞ്ഞു. അട്ടിമറി അവസാനിപ്പിച്ച് രാജ്യത്തുടനീളം സര്‍ക്കാര്‍ അധികാരം വ്യാപിപ്പിക്കുകയാണ് ലക്ഷ്യം. കടലിലെ കപ്പലുകളെ സംരക്ഷിക്കുന്നത് തീരത്തുനിന്നുള്ള ഭീഷണികള്‍ അവസാനിപ്പിക്കാതെ പൂര്‍ണമാകില്ലെന്നും ബാബ് അല്‍-മന്ദബിന്റെ സുരക്ഷ തീരത്തുനിന്നാണ് ആരംഭിക്കുന്നതെന്നും അവര്‍ പറഞ്ഞു.
യെമന് സൗദി അറേബ്യ നല്‍കുന്ന രാഷ്ട്രീയ, സൈന്യ, സാമ്പത്തിക പിന്തുണകളെ മന്ത്രി പ്രശംസിച്ചു. പിടിച്ചെടുത്ത നഗരങ്ങളുടെ എണ്ണമല്ല, മറിച്ച് പൗരന്മാര്‍ക്ക് സുരക്ഷ തിരികെ ലഭിക്കുന്നതാണ് വിജയത്തിന്റെ അളവുകോലെന്നും അവര്‍ വ്യക്തമാക്കി.
കഴിഞ്ഞ വര്‍ഷം ഹൂതികള്‍ക്കായി കൊണ്ടുപോയ 750 ടണ്ണിലധികം ആയുധങ്ങളും ഉപകരണങ്ങളും യെമന് സുരക്ഷാ സേന പിടിച്ചെടുത്തിരുന്നു. മിസൈലുകള്‍, ഡ്രോണ്‍ എന്‍ജിനുകള്‍, റഡാര്‍ ഉപകരണങ്ങള്‍ എന്നിവ ഇതില്‍ ഉള്‍പ്പെടുന്നു. ജനങ്ങളുടെ ജീവനും സഞ്ചാര സ്വാതന്ത്ര്യത്തിനും മേലുള്ള ഭീകരാക്രമണമാണ് ഏദന്‍ അന്താരാഷ്ട്ര വിമാനത്താവളത്തിന് നേരെ ഉണ്ടായതെന്ന് മന്ത്രി അപലപിച്ചു.
പ്രസിഡന്‍ഷ്യല്‍ ലീഡര്‍ഷിപ്പ് കൗണ്‍സില്‍ പ്രസിഡന്റ് ഡോ. റഷാദ് അല്‍-അലിമിയുടെ ഭരണഘടനാപരമായ ഉത്തരവുകളുടെ അടിസ്ഥാനത്തിലാണ് 'യെമന് ഡാണ്‍' സൈനിക നടപടി ആരംഭിച്ചതെന്നും, യെമന്റെ പരമാധികാരവും ഐക്യവും സംരക്ഷിക്കാന്‍ സര്‍ക്കാര്‍ പ്രതിജ്ഞാബദ്ധമാണെന്നും അഫ്ര അല്‍-സൂബ കൂട്ടിച്ചേര്‍ത്തു.
.jpg)
